Cody Wilson süni intellektin hazırladığını dediyi 3D çap tapançanı göstərdi

    Silah hüquqları fəalı Cody Wilson süni intellektin hazırladığını iddia etdiyi “WASP” adlı 3D çap tapançanı göstərib. Wilson bunu süni intellektin yaratdığı ilk silah adlandırır. .22 kalibrli model hər dəfə 1 atəş açır və real, öldürücü patronlarla işləyir. Silahın üzərində seriya nömrəsi yoxdur. Wilsonun sözlərinə görə, dizaynı “GatGPT” adlı xüsusi süni intellekt modeli hazırlayıb.

    “WASP” Texas ştatının Ostin şəhərində sınaqdan keçirilib. Təhlükəsizlik üçün silah xüsusi dayağa bərkidilib. İlk cəhddə zərbə mexanizmi patronu işə sala bilməyib. Sonrakı cəhdlərdə silah atəş açıb və sınaqda 3 atışdan 2-si uğurlu olub. Güllələrdən biri karton hədəfə dəyib, digəri hədəfin bir qədər yuxarısından keçib.

    “GatGPT” Wilsonun rəhbərlik etdiyi “DEFCAD” platformasındakı çoxsaylı silah faylları ilə öyrədilib. İstifadəçi sistemdən hazır tapança layihəsini əsas götürərək yeni dizayn hazırlamasını istəyib. Süni intellekt dəyişikliklər təklif edib və yazışma zamanı hissələri yoxlayıb. “Defense Distributed” komandası son modeli ofisdə təxminən 6 saata çap edib. Xidmət hələ yalnız məhdud sayda istifadəçi üçün açıqdır.

    Mütəxəssislər “WASP” dizaynında bir neçə ciddi qüsur görüblər. Tətiyi qoruyan halqa tam deyil, tutacağın forması qəribədir, nişangahların da işləmədiyi düşünülür. Silah tarixçisi Ashley Hlebinsky modelin görünüşünü süni intellektin yaratdığı natamam təsvirlərə bənzədib. Jonathan Ferguson deyib ki, silah atəş aça bilir, amma onu rahat tutmaq və nişan almaq çətindir. Onun fikrincə, model texniki baxımdan da zəifdir.

    Silah təhlükəsizliyi təşkilatı “Everytown” hesab edir ki, belə sistemlər 3D çaplı silah hazırlamaq üçün lazım olan texniki biliyi azaldır. Nəticədə təcrübəsiz istifadəçi bir neçə sorğu yazaraq işlək silah layihəsi əldə edə bilər. Nyu-York və Kaliforniyada qəbul olunan qanunlar gələcək 3D printerlərdə silah hissələrini tanıyaraq çapı dayandıran proqramın olmasını tələb edir. Ancaq belə proqramların yeni və qeyri-adi dizaynları düzgün tanıyıb-tanımayacağı hələ aydın deyil.

    Wilson avqustda faylın rəqəmsal izini dəyişən “Hochulization” alətini də çıxarıb. Onun iddiasına görə, sentyabrın sonunadək fayllar bu üsulla 26 000 dəfədən çox dəyişdirilib. ABŞ-nin federal qanunlarına əsasən, lisenziyalı istehsalçıların satdığı silahların əsas hissələrində seriya nömrəsi olmalıdır. Wilson silah fayllarını ifadə azadlığının qoruduğu kompüter kodu sayır. O, “GatGPT”nin daha çox məlumat öyrəndikcə yaxşılaşacağını düşünür.