Eiliko AI robotlarında söhbətlər oxuna, cavablar dəyişdirilə bilərdi

    “Energize Lab” çantaya asılan və süni intellektlə söhbət edən “Eiliko” robotlarında ciddi təhlükəsizlik boşluqları olduğunu təsdiqləyib. Bu boşluqlara görə kənar şəxslər istifadəçilərin robotla bütün söhbətlərini oxuya bilirdi. Problemləri aradan qaldırmaq üçün şirkət müstəqil təhlükəsizlik şirkətini işə cəlb edəcək və sistemləri tam yoxlayacaq.

    Təhlükəsizlik araşdırmaçısı Sammy Azdoufal 1 aydan çox şirkətlə əlaqə saxlamağa çalışsa da, cavab ala bilməyib. O, araşdırma zamanı robotların cavablarını uzaqdan dəyişdirmək üçün idarəetmə interfeysi də tapıb. Azdoufalın sözlərinə görə, robotlara SSH ilə tam giriş hələ də açıqdır. SSH cihazı uzaqdan idarə etmək üçün işlədilən bağlantı üsuludur.

    “Energize Lab” arxa sistemlərə bütün xarici girişləri bağladığını və giriş məlumatlarını yenilədiyini açıqlayıb. Robotların cavablarını uzaqdan dəyişdirən interfeys də söndürülüb. Şirkət uzunmüddətli yaddaş funksiyasını dayandırıb. Artıq söhbət qeydləri və həmin məlumatlardan yaradılan istifadəçi profilləri saxlanmır. Xüsusi avatar funksiyası da müvəqqəti bağlanıb.

    Ancaq yoxlama “Eiliko” sistemlərinin hələ təhlükəsiz olmadığını göstərib. İstifadəçilərin səs yazıları və fotoları qorunmayan açıq internet ünvanlarında qalıb. Keçidi əldə edən hər kəs heç bir təsdiqləmə olmadan bu fayllara baxa bilirdi. Araşdırmaçıya görə, söhbətləri oxumaq və robotun davranışını dəyişmək nəzəri olaraq hələ də olar.

    “Energize Lab” saxlanmış söhbət qeydlərini, istifadəçi profillərini, avatar şəkillərini və əlaqəli məlumatları siləcəyinə söz verib. Bununla yanaşı, şirkət şəxsi məlumatların toplanmasını birdəfəlik dayandıracağını deməyib. Uzunmüddətli yaddaş və xüsusi avatar funksiyaları yalnız müstəqil yoxlama onların təhlükəsiz olduğunu təsdiqləyəndən sonra yenidən açılacaq. Şirkət etimadı yalnız gələcək addımları ilə bərpa edə biləcəyini qəbul edib.