Flock şirkəti 335 701 kameranın yerini göstərən xəritəni bağlatmaq istəyir

    “Flock” şirkəti təhlükəsizlik boşluğundan yararlanılaraq hazırlanmış kamera xəritəsinin bağlanmasını istəyir. Tədqiqatçı Joshua Michael şirkətin saytından giriş məlumatı tələb etməyən rəqəmsal açar əldə edib. O, 2025-ci ilin noyabrında bu açarla “Flock”un işlətdiyi “ArcGIS” xəritə xidmətinə sorğu göndərib və cihazların yer məlumatlarını çıxarıb. Daha sonra yaratdığı “Flock Surveillance Map” saytı 335 701 kameranın yerini göstərir.

    Michael təhlükəsizlik boşluğu barədə şirkətə 13 noyabr 2025-ci ildə məlumat verib. Tədqiqatçı deyir ki, yalnız hamıya açıq və giriş tələb etməyən ünvanları yoxlayıb. O, giriş yoxlamasını keçməyə çalışmayıb, məlumatları dəyişməyib və ödənişli əməliyyat başlatmayıb. “Flock” yalnız 3-cü müraciətdən sonra məsələni daxildə araşdırdığını yazıb. Boşluq nəticələr açıqlandıqdan sonra, 2026-cı ilin yanvarında bağlanıb, lakin tədqiqatçıya əlavə cavab verilməyib.

    Michael boşluq aradan qaldırılmamışdan əvvəl cihazların yer məlumatlarını köçürə bilib. Onun sözlərinə görə, xəritədəki məlumatlar sonuncu dəfə, ehtimal ki, 2025-ci ilin dekabrında yenilənib. “Flock” sistemin heç vaxt sındırılmadığını və məlumatların sızmadığını deyir. Şirkət “Flock Safety” bulud platformasında da təhlükəsizlik pozuntusu yaşanmadığını vurğulayır. Tədqiqatçı isə hesab edir ki, şirkət məlumatların çıxarıldığını bilib, amma bunu açıqlamayıb və ya hadisəni ümumiyyətlə aşkar edə bilməyib.

    Hadisə “Flock” sistemində daha əvvəl aşkarlanan təhlükəsizlik problemlərindən sonra üzə çıxıb. Hakerlər kameraların məlumatları qoruyan şifrələmə açarlarını birbaşa cihazlarda saxladığını müəyyən etmişdilər. Onlar 27 000-dən çox videonu çıxara bilmişdilər. Həmin materiallardan sistemin 21 gün ərzində 1,6 milyondan çox görüntü çəkdiyi də aydın olmuşdu. Polis əməkdaşlarının sistemdən şəxsi münasibətdə olduqları insanları izləmək üçün yararlandığı hallar da qeydə alınıb. Başqa bir hadisədə avtomobil icmalçısı səhv hesabat üzündən 1 saat saxlanılıb.

    Tədqiqatçının təhlilinə görə, bu kamera şəbəkəsi hərbçilərin və müdafiə sənayesi əməkdaşlarının hərəkətini izləmək üçün də işlədilə bilər. Xəritə ümumilikdə 22 həssas obyekti əhatə edir. Bunların arasında “Eglin” Hərbi Hava Qüvvələri bazası, Mərkəzi Kəşfiyyat İdarəsi və Federal Təhqiqat Bürosunun qərargahları var. Siyahıya “Joint Base Andrews” və Pentaqon da daxildir. Bu məkanlardan təxminən 32 km radiusda yaşayanların kameralara düşmə ehtimalı hesablanıb. Göstərici 57,22 faizlə 93,94 faiz arasındadır.

    “Flock” məsələ ilə bağlı açıqlama verməyib. Sosial mühəndislik hücumlarından müdafiə sahəsində çalışan “Doppel” şirkəti isə xəritə saytına ticarət nişanı ilə bağlı şikayət göndərib. Şikayətdə “FLOCK SAFETY” adının icazəsiz işlədildiyi və bunun müştəriləri çaşdıra biləcəyi yazılıb. Buna əsasən saytın bağlanması tələb olunur. Halbuki xəritə açılarkən saytın “Flock” ilə əlaqəsinin olmadığını deyən xəbərdarlıq görünür.