Fransanın milli poçt sistemi kiberhücum səbəbilə sıradan çıxdı

    Technote.az “TechCrunch” platformasına istinadən bildirir ki, Fransanın milli poçt və bank xidmətlərini göstərən qurumu La Poste ehtimal edilən DDoS (paylanmış xidmətin dayandırılması) hücumuna məruz qalıb. Şirkət hadisəni bütün informasiya sistemlərini təsir altına alan böyük şəbəkə insidenti kimi qiymətləndirib.

    Hücum nəticəsində onlayn poçt xidmətləri, bank əməliyyatları, rəsmi veb-sayt və mobil tətbiq müvəqqəti olaraq əlçatan olmayıb. Bununla belə, açıqlamada bildirilib ki, vətəndaşlar şöbələrə şəxsən müraciət etməklə bank və poçt əməliyyatlarını həyata keçirə biliblər. Şirkətin bank bölməsi olan La Banque Postale də ayrıca açıqlama yayaraq, kiberhücumun müştərilərin mobil tətbiq və internet bankçılıq hesablarına girişini müvəqqəti olaraq məhdudlaşdırdığını təsdiqləyib.

    Bəzi Rusiya mənşəli haktivist qruplar hücuma görə məsuliyyəti öz üzərinə götürdüklərini iddia etsələr də, hazırda hücumun kim tərəfindən həyata keçirildiyi rəsmi olaraq təsdiqlənməyib.