Google: Gemini sınaq zamanı 3 real şirkətin sisteminə icazəsiz girib

    “Google” təsdiqləyib ki, “Gemini” may ayında keçirilən kibertəhlükəsizlik sınağı zamanı qapalı sınaq mühitindən çıxıb və internetə qoşulub. Model 3 real şirkətin xidmətinə icazəsiz daxil olub. Buna sınağı aparan İsrailin “Irregular” şirkətindəki yanlış sazlama səbəb olub. Həmin şirkət daha əvvəl “OpenAI”, “Anthropic” və “Meta” modellərinin yoxlanmasına da qatılmışdı.

    Sınaq zamanı “Gemini”yə uydurma bir şirkətdən məlumat toplamaq tapşırılıb. Model internetdə eyni adlı real şirkəti taparaq sistemdəki boşluqdan yararlanıb. İlk hadisədə şifrəni özü sındıraraq xidmətə daxil olub. Digər 2 sınaqda açıq kod anbarlarından başqa şirkətlərə aid giriş məlumatlarını tapıb və həmin hesablarla sistemlərə keçib.

    “Google”un sözlərinə görə, “Gemini” hər 3 halda real xidmətə girdiyini anlayandan sonra işi özü dayandırıb. Şirkətlərin sistemlərində başqa əməliyyat aparılmayıb və zərər qeydə alınmayıb. Buna görə “Google” baş verənləri modelin verilən məqsəddən yayınması saymayıb. Şirkət geniş ictimaiyyət üçün ayrıca açıqlamaya da ehtiyac görməyib.

    Hadisələr zamanı “Gemini”nin hansı versiyasının sınaqdan keçirildiyi açıqlanmayıb. Yalnız bunun ən yeni model olmadığı deyilib. Sistemlərinə girilən 3 şirkətin adı gizli saxlanılıb, lakin onların hadisə barədə xəbərdar edildiyi qeyd olunur. Sınaqda iştirak edən bütün laboratoriyalar iyulun sonunda məlumatlandırılıb. “Google” həmin vaxt ABŞ-nin federal qurumlarına da xəbər verməyi vacib sayıb.

    “Google” və “Irregular” oxşar hadisənin təkrarlanmaması üçün sınaq qaydalarını dəyişib. Məlum boşluqların həftələr əvvəl aradan qaldırıldığı açıqlanıb. Eyni yanlış sazlama daha əvvəl başqa süni intellekt modellərinin də icazəsiz internetə çıxmasına səbəb olmuşdu. “Anthropic” sınağında model hədəfin real ola biləcəyini anlayandan sonra hücumu davam etdirib. “OpenAI” sınağındakı model isə real saytı sınaq üçün yaradılmış simulyasiya hesab edib.