Hindistan Telegram və Signal-a qarşı araşdırmaya başladı

    Hindistan hökuməti mesajlaşma tətbiqlərində telefon nömrəsi əvəzinə istifadəçi adı ilə ünsiyyət qurulmasına qarşı nəzarəti genişləndirir. Ölkənin Elektronika və İnformasiya Texnologiyaları Nazirliyi (MeitY) artıq WhatsApp-dan sonra Telegram və Signal-a da rəsmi bildiriş göndərib. Reuters-in məlumatına görə, Hindistan hökuməti hər iki platformadan istifadəçi adı funksiyasının niyə saxlanılmalı olduğunu və bu sistemin saxta hesablar, fırıldaqçılıq və kimlik saxtakarlığı risklərinə qarşı necə qorunduğunu izah etməyi tələb edib.

    Bir gün əvvəl Hindistan hökuməti WhatsApp-a da oxşar bildiriş göndərərək, istifadəçi adlarının "fərdlərin, dövlət qurumlarının və maliyyə təşkilatlarının adından saxta hesablar yaradılmasını asanlaşdıra biləcəyini" bildirmişdi. Son illərdə Hindistanda onlayn dələduzluq, fişinq hücumları və özünü polis və ya dövlət məmuru kimi təqdim edən şəxslərin vətəndaşlardan pul tələb etdiyi "rəqəmsal həbs" fırıldaqları ciddi problemə çevrilib. Rəsmilər hesab edir ki, telefon nömrəsinin gizlədilməsi və yalnız istifadəçi adı ilə əlaqə qurulması bu cür cinayətlərin izlənməsini çətinləşdirir.

    Telegram daha əvvəl də Hindistan hökuməti ilə problemlər yaşayıb. Tətbiq bu ilin iyun ayında təxminən bir həftə ərzində ölkə üzrə bloklanmışdı. Hökumət platformadakı bəzi kanalların tibbi qəbul imtahanı olan NEET-in sızdırılmış suallarının satışında istifadə edildiyini iddia etmişdi. Signal isə indiyədək Hindistan tənzimləyicilərinin diqqət mərkəzində olmayıb. Bununla belə, platformanın istifadəçi məxfiliyinə yönəlmiş arxitekturası və telefon nömrəsini gizlədən istifadəçi adı sistemi indi hökumətin araşdırmasına səbəb olub.