Malayziya məlumat mərkəzlərinə AI çipi və enerji hesabatı öhdəliyi qoyacaq

    Malayziya məlumat mərkəzləri üçün yeni qanun hazırlayır. Operatorlar süni intellekt sistemlərində işlədilən sürətləndirici çiplərin idxalı və enerji sərfiyyatı barədə məlumat verməli olacaqlar. Məqsəd satışı məhdudlaşdırılan avadanlığın Çin kimi ölkələrə göndərilməsinin qarşısını almaq və elektrik şəbəkəsindən daha səmərəli yararlanmaqdır. Bəzi şirkətlərin Malayziyaya qanuni yolla gətirdiyi GPU-ları, yəni qrafik prosessorları sonradan xaricə göndərdiyi aşkarlanıb.

    Qanuna əsasən, operatorlar idxal olunan GPU-ların sayını və gözlənilən enerji sərfiyyatını açıqlamalıdırlar. Obyektlərin ünvanı, operatorlar və iri bulud xidməti müştəriləri haqqında da məlumat tələb olunacaq. Hökumətin nəzarəti yalnız layihənin təsdiqi ilə bitməyəcək. Məlumat mərkəzləri işlədikləri bütün müddət ərzində izlənəcək, ölkəyə gətirilən süni intellekt çipləri də Malayziyada işlədilməlidir. Hakimiyyət konkret GPU-ların hansı obyektlərdə yerləşdiyi barədə ABŞ ilə məlumat paylaşmağa hazırdır.

    Operatorlar əvvəlcədən ayırtdıqları elektrik gücünün hamısına görə ödəniş edəcəklər, hətta onu tam işlətməsələr də. Məsələn, 100 MVt güc ayıran, amma yalnız 50 MVt işlədən məlumat mərkəzi qalan 50 MVt üçün də pul ödəyəcək. Bu qayda şirkətlərin 1 ildən 3 ilədək ehtiyac duymayacağı gücü əvvəlcədən tutmasını azaltmalıdır. İdxal olunan GPU sayı ilə real enerji sərfiyyatı arasındakı fərq şübhəli halları üzə çıxara bilər.

    Ancaq enerji sərfiyyatına baxaraq obyektdə neçə GPU işlədiyini dəqiq müəyyən etmək olmur. “Nvidia”nın “H100” və “H200” modelləri üçün göstərilən enerji sərfiyyatı 700 Vt, “B200” üçün 1000 Vt-dır. Lakin real iş zamanı bu göstəricilər dəyişir. Server prosessorları, yaddaş, məlumat saxlama qurğuları, şəbəkə avadanlığı və soyutma sistemi də elektrik sərf edir. Buna görə dəqiq yoxlama üçün avadanlığın yerində sayılması və hər çipin ayrıca izlənməsi lazım ola bilər. Qanunda model və seriya nömrəsinin tələb olunub-olunmayacağı, eləcə də yerində yoxlama aparılıb-aparılmayacağı hələ açıqlanmayıb.

    Malayziya Cənub-Şərqi Asiyada məlumat mərkəzlərinə ən çox sərmayə cəlb edən ölkələrdən birinə çevrilib. Ölkə indiyədək 117 məlumat mərkəzi layihəsini təsdiqləyib, onların 55-i artıq işləyir. Bulud xidməti və süni intellekt infrastrukturu şirkətləri böyüdükcə nəzarətin əhatəsi də genişlənir. Çoxlu sayda obyekt qanuni avadanlıq idxalını artırsa da, məhdudlaşdırılmış çiplərin başqa ölkələrə göndərilməsini gizlətməyi asanlaşdıra bilər.