Mütəxəssis Nvidia-nın 8 GB yaddaşlı mədən kartını 80 GB-a çevirdi

    Kate adlı mütəxəssis gərginliyə müdaxilə üsulu ilə 8 GB yaddaşlı “Nvidia CMP-170HX” mədən kartını 80 GB yaddaşlı sürətləndiriciyə çevirib. Dəyişdirilmiş kart bəzi hesablamalarda daha bahalı “Nvidia A100” modelini də geridə qoyub. Hazırda 8 GB versiya təxminən 3000 dollara (5100 manat) satılır. 10 GB versiyanın qiyməti 2500 dollardır (4250 manat). 80 GB yaddaşlı “A100” isə 20 000 dollara (34 000 manat) başa gələ bilər.

    Bu dəyişikliyin işləməsi “GA100” çipində yaddaş bloklarının fiziki olaraq qalması ilə bağlıdır. İstehsalçı daha aşağı səviyyəli modellərdə yüksək sürətli HBM2e yaddaşının və bəzi hesablama modullarının bir hissəsini elektron qoruyucularla söndürür. Kartdakı 16 384 qoruyucu yaddaş və hesablama modulları da daxil olmaqla müxtəlif hissələri idarə edir. Onlar həmçinin PCIe 4.0 bağlantısına, kartlararası sürətli əlaqə yaradan “NVLink” sisteminə və video avadanlığına nəzarət edir. 8 GB versiyada əslində 80 GB, 10 GB versiyada isə 40 GB yaddaşa uyğun çiplər qoyulub.

    Kate qoruyucuları idarə edən sistemin müdafiəsini keçmək üçün ayrıca elektron lövhə hazırlayıb. Sxemin hazırlanmasında “GPT-6 Astra” modelindən yararlanıb. Lövhənin əsas hissəsi 8 dollarlıq (təxminən 14 manat) “STM32G4” mikronəzarətçisidir. Qurğu kartın gərginliyini tənzimləyən PWMVID siqnallarına müdaxilə edərək qısa gərginlik sıçrayışları yaradıb. Nəticədə qoruyucu nəzarətçisi dəyişiklik əmrlərini qəbul etməyə başlayıb.

    Sınaq zamanı 9 kartda 80 GB yaddaş işləyib, başqa bir kartda isə 64 GB yaddaşdan istifadə olunub. Sağlam hesablama modulları açıldıqdan sonra kartın 16 bitlik hesablamalardakı FP16 FMA göstəricisi standart “A100” modelindən 20% yüksək çıxıb. Kate bunu çiplərdə 108 əvəzinə 120 və ya daha çox işlək modulun qalması ilə izah edir. “GA100” çipi istehsal qüsurlarının təsirini azaltmaq üçün ümumilikdə 128 modulla hazırlanır.

    Əvvəlki “CMPUnlocker” proqram dəyişikliyi yalnız 40 - 64 GB yaddaşı aça bilirdi. Üstəlik, kartın bağlantı sürəti PCIe 2.0 ilə məhdudlaşırdı. Yaddaş səhvlərini düzəldən ECC, “NVLink” və bir neçə virtual GPU işlətmək funksiyası da aktiv olmurdu. Yeni gərginlik müdaxiləsi bu məhdudiyyətləri aradan qaldırıb. Ən uğurlu sınaq kartı PCIe 4.0 sürətində və bütün server funksiyaları açıq halda işləyib.

    Proses geri qaytarılmır. Buna görə zavodda qüsurlu sayılmış modulların yenidən açılması kartı sıradan çıxara bilər. Kate riskli modulları bağlı saxlayıb və video kodlaşdırma hissəsini sınaqdan keçirməyib. Araşdırma başqa bir şəxsin də eyni boşluğu müstəqil şəkildə tapmasından sonra yayımlanıb. “Nvidia” problemdən xəbərdar edilib, lakin artıq satılmış kartlarda bu üsulun qarşısını almaq çətin görünür.