Oğurlanan iPhone-lar artıq sıfırlana bilmir

    Londonda oğurlanan iPhone-ların yenidən aktivləşdirilərək satılması hallarında son həftələr ərzində ciddi azalma müşahidə olunur. Məlumata görə, bunun əsas səbəbi Apple-ın təqdim etdiyi Stolen Device Protection (Oğurlanmış Cihaz Mühafizəsi) funksiyasıdır. Son illərdə Londonda iPhone oğurluqları geniş yayılmışdı. Hətta bəzi hallarda oğrular oğurladıqları telefonun iPhone olmadığını anlayanda onu sahibinə geri qaytarırdılar. Əksər hallarda motosiklet və ya mopedlə hərəkət edən cinayətkarlar insanların əlindən telefonu alaraq hadisə yerindən uzaqlaşır, daha sonra isə cihazı sıfırlayıb ikinci əl bazarında satmağa çalışırdılar.

    Bununla belə, vəziyyət dəyişməyə başlayıb. London Metropoliten Polis Komissarı Ser Mark Rouli BBC-yə açıqlamasında bildirib ki, Apple-ın təhlükəsizlik yenilikləri nəticəsində oğurlanan iPhone-ların böyük əksəriyyəti artıq zavod parametrlərinə qaytarıla bilmir.

Apple ilk dəfə 2023-cü ildə təqdim etdiyi Stolen Device Protection funksiyasını 2026-cı ilin mart ayında yayımlanan iOS 26.4 yeniləməsi ilə standart olaraq aktiv edib. Bu funksiya sayəsində cihazın "Lost Mode" rejiminin söndürülməsi və ya tam sıfırlanması üçün mütləq Face ID və ya Touch ID kimi biometrik təsdiq tələb olunur. Bəzi təhlükəsizlik əməliyyatları isə əlavə vaxt gecikməsi ilə həyata keçirilir ki, bu da istifadəçiyə "Find My" xidməti vasitəsilə telefonu itirilmiş kimi işarələmək üçün imkan yaradır.

    Ən diqqətçəkən məqam isə odur ki, oğru cihazın şifrəsini bilsə belə, onu asanlıqla sıfırlaya və yenidən satışa hazırlaya bilmir. Nəticədə oğurlanmış iPhone-ların qara bazardakı dəyəri azalır və bu tip cinayətlərin iqtisadi cəhətdən cəlbediciliyi zəifləyir. Ser Mark Rouli əlavə edib ki, London polisi Apple ilə məlumat mübadiləsi üzrə xüsusi əməkdaşlıq razılaşması da əldə edib. Bu əməkdaşlığın məqsədi iPhone oğurluqlarının necə həyata keçirildiyini və cihazların hansı yollarla satışa çıxarıldığını daha yaxşı analiz etməkdir. Oğurlanmış telefonların istifadəsini və satışını çətinləşdirən bu cür təhlükəsizlik tədbirləri gələcəkdə iPhone oğurluqlarının sayının da azalmasına səbəb ola bilər.