OpenAI kibermüdafiəyə 1 milyard dollar (təxminən 1,7 milyard manat) ayırıb

    “OpenAI” maddi imkanları məhdud olan kibertəhlükəsizlik təşkilatlarına “Daybreak” proqramından yararlanmaq üçün 1 milyard dollar (təxminən 1,7 milyard manat) dəyərində kredit ayırıb. Bu vəsait nağd şəkildə verilməyəcək. Kredit süni intellekt modellərinə sorğu göndərmək və cavab almaq üçün nəzərdə tutulan istifadə vahidlərinə - tokenlərə sərf olunacaq. “Daybreak for Frontline Defenders” adlı qlobal təşəbbüs ilk olaraq ABŞ ərazisində başladılıb. Şirkət kreditlərin qarşıdakı 6 ay ərzində istifadə olunmasını planlaşdırır.

    “Daybreak” yoxlamadan keçmiş kibertəhlükəsizlik mütəxəssislərinə xüsusi süni intellekt modelləri və alətləri təqdim edən proqramdır. “OpenAI” proqramı 2026-cı ilin mayında istifadəyə verib. Daha sonra sistemə “Blue” və “Red” adlı 2 səviyyə əlavə olunub. “Blue” ümumi məqsədli model və xüsusi qoruyucu məhdudiyyətlər təklif edir. “Red” isə konkret kibertəhlükəsizlik tapşırıqları üçün hazırlanıb və demək olar ki, qoruyucu məhdudiyyəti yoxdur.

    Şirkətin məlumatına görə, hazırda 2 000 təsdiqlənmiş təşkilat və iş məkanında minlərlə müdafiə mütəxəssisi “Daybreak”dən yararlanır. Onların arasında kibertəhlükəsizlik şirkətləri, müdafiə qurumları və asayişi qoruyan dövlət orqanları var. Yeni kreditlər proqramın xərcini ödəyə bilməyən təşkilatların da sistemdən istifadə etməsinə şərait yaradacaq.

    Kreditlərin bölüşdürülməsi zamanı su və kanalizasiya sistemləri, həmçinin elektrik şəbəkələri kimi vacib xidmətləri idarə edən qurumlara üstünlük veriləcək. Daha sonra ştat və yerli hökumətlər, icma və regional banklar, kommersiya məqsədi daşımayan təşkilatlar və açıq mənbəli layihələrin idarəçiləri nəzərə alınacaq. Təhlükəsizlik imkanları məhdud olan digər təşkilatlar da proqrama müraciət edə biləcək.

    “OpenAI” birbaşa kibertəhlükələrlə işləyən mütəxəssislər üçün praktiki yardımı və təlimləri artırmağı, həmçinin yeni tərəfdaşlıqlar qurmağı planlaşdırır. Şirkət Ştatlararası Məlumat Mübadiləsi və Təhlili Mərkəzi ilə birlikdə dövlət sektoru və su sistemlərinə yönəlmiş sınaq proqramına da başlayır. Layihə yerli, tayfa və ərazi qurumlarında çalışan ilkin iştirakçı qrupuna “Daybreak”ə giriş, təlim və praktiki yardım verəcək. İştirakçılar aşkarlanan problemləri yoxlamağı, onları vacibliyinə görə sıralamağı və aradan qaldırılması prosesini əlaqələndirməyi öyrənəcəklər.