Roblox Corporation uşaqlar üçün yeni təhlükəsizlik sistemi təqdim edir

    Technote.az “TechCrunch” platformasına istinadən bildirir ki, Roblox Corporation uşaqların təhlükəsizliyini artırmaq məqsədilə yeni yaş əsaslı hesab sistemini təqdim edib. Şirkət artıq istifadəçiləri yaşlarına uyğun olaraq fərqli hesab kateqoriyalarına böləcək və bu hesablar onların hansı oyunlara və söhbət funksiyalarına çıxış əldə edə biləcəyini müəyyənləşdirəcək.

    Yeni qaydalara əsasən, 5-9 yaş arası istifadəçilər “Roblox Kids” hesabına, 9-15 yaş arası istifadəçilər isə “Roblox Select” hesabına yönləndiriləcək. 16 yaş və daha yuxarı istifadəçilər standart hesabdan istifadə edəcək. Bununla yanaşı, yalnız 18 yaşdan yuxarı şəxslər güclü zorakılıq, romantik mövzular və sərt dil istifadəsi olan “Restricted Content” kateqoriyalı məzmuna giriş əldə edə biləcəklər.

    “Roblox Kids” hesabına sahib uşaqlar yalnız minimal və yüngül kontent reytinqinə malik oyunları oynaya biləcəklər. Bu kateqoriyaya nadir hallarda rast gəlinən yüngül zorakılıq, sadə qorxu elementləri və yumşaq zarafatlar daxildir. Həmçinin 9 yaşdan aşağı uşaqlar üçün çat funksiyası standart olaraq deaktiv ediləcək. Onlar yalnız valideynin icazə verdiyi şəxslərlə mesajlaşa biləcəklər. “Roblox Select” hesabı isə daha böyük yaş qrupundakı istifadəçilər üçün nəzərdə tutulub və bu hesab sahibləri “Moderate” səviyyəsinə qədər qiymətləndirilmiş oyunlara çıxış əldə edə biləcəklər. Onlar həmçinin yalnız oxşar yaş qrupundakı istifadəçilərlə ünsiyyət qura biləcəklər.

    Valideynlərə əlavə nəzarət imkanları da təqdim olunacaq. Belə ki, valideyn istədiyi halda övladına standart limitlərdən kənar bəzi oyunlara xüsusi icazə verə biləcək. Bu xüsusiyyət xüsusilə fərqli yaşda bacı-qardaşların birlikdə oyun oynaması üçün nəzərdə tutulub. Şirkət bildirib ki, bu sistemə daxil ediləcək bütün oyunlar əvvəlcədən üç mərhələli təhlükəsizlik yoxlamasından keçəcək. Buraya oyun tərtibatçısının verifikasiyası, real istifadəçi testləri və Roblox Corporation moderasiya sistemi tərəfindən yoxlama daxildir.