Roblox-la bağlı olduğu düşünülən skaner icazəsiz 145,5 GB məlumat toplayıb

    “Open3DLab” 3D modelləşdirmə icması “Roblox” oyun platforması ilə əlaqəli olduğunu düşündüyü veb skaneri icazəsiz məlumat toplamaqda günahlandırıb. Saytları avtomatik gəzərək məlumat yığan proqram “Open3DLab”, “SFMLab” və “SmutBase” kataloqlarından 145,5 GB məlumat endirib. Yüklənən materiallar 712 layihəyə aid olub və 1027 faylın tam nüsxəsini əhatə edib. İcma bu faylların süni intellekt modelini öyrətmək və ya yoxlamaq üçün götürüldüyünü düşünür. Ancaq bunu sübut edə bilmədiyini də vurğulayır.

    Hadisə 18 oktyabrda, skanerin sayta və yükləmə sisteminə çoxlu sorğu göndərməsi ilə üzə çıxıb. Proqram 34 saat ərzində 26 429 sorğu göndərərək 18 926 layihəlik kataloqun demək olar hamısını qeydə alıb. Sorğular “Amazon AWS” xidmətindəki tək ünvandan gəlib. Skanerin özünü tanıtmaq üçün göndərdiyi məlumatda “Roblox” e-poçt ünvanı göstərilib. Proqram məlumat yığılmasını qadağan edən “robots.txt” faylına, istifadə şərtlərinə və müəllif lisenziyalarına məhəl qoymayıb.

    Endirilən materialların böyük hissəsi böyüklər üçün işarələnmiş layihələr olub. “SmutBase” saytından 224 layihəyə aid 364 fayl götürülüb. Onların ümumi həcmi 54,8 GB olub. “SFMLab” kataloqundan da böyüklər üçün işarələnmiş 345 layihəyə aid 62,6 GB material endirilib. “Open3DLab” hesab edir ki, “Roblox” bu məzmunu qəsdən toplamayib. Bununla belə, qeydlər faylların əvvəlcədən yoxlanılmadığını göstərir.

    İcma fəaliyyəti həmin gün aşkarlayıb, növbəti səhər isə skanerin girişini bloklayıb. Buna baxmayaraq, yükləmə cəhdləri 19 oktyabrda da davam edib və yalnız günorta saatlarında qısa fasilə yaranıb. Sorğular 20 oktyabrda azalıb, daha sonra tam dayanıb. Pulsuz serverlərdəki məhdudiyyətlər yükləmə sürətini aşağı salıb. “Open3DLab” məsələ ilə bağlı açıqlama istəsə də, “Roblox” cavab verməyib. İcma bundan sonra saytın müdafiəsini gücləndirib.

    Skanerin özünü tanıtma məlumatında “3D foundation model research” ifadəsi yazılıb. İcma bunu “Roblox Cube” layihəsi ilə əlaqələndirir. “Roblox” 2025-ci ilin martında 3D modellər yaratmaq üçün hazırlanmış “Roblox Cube” adlı əsas generativ süni intellekt sistemini çıxarıb. Təbii dil əmrləri ilə oyun modelləri qura bilən “4D generation” texnologiyasının beta versiyası 2026-cı ilin fevralında açılıb. Skanerdə göstərilən e-poçt ünvanının “Roblox Cube” araşdırmasında adı çəkilən tədqiqatçılardan birinə aid olduğu deyilir.