Şimali Koreya hackerləri ilin əvvəlindən 200 milyon dollarlıq kriptovalyuta oğurlayıblar

    TRM Labs. adlı şirkətin aparmış olduğu yeni tədqiqata əsasən Şimali Koreya ilə əlaqəli olan hackerlər bu ilin yanvar ayından 18 avqut tarixinə kimi 200 milyon dollar dəyərində kriptovalyuta oğurlayıblar. Bu isə 2023-cü il ərzində oğurlanmış bütün kriptovalyutaların 20%-ni təşkil edir. TRM Labs. şirkətinin mütəxəssislərinin fikirlərinə əsasən oğurlanmış vəsaitlər Şimali Koreya hökumətinin hərbi proqramlarının reallaşdırılmasında istifadə edilir.

    Kriptovalyutaların oğurlanması üçün hackerlər müxtəlif üsullardan istifadə edirlər. Bura həmçinin fişinq (phishing) hücumlar, bu və ya digər infrastrukturun hack edilməsi də daxildir. Məlumata əsasən keçən il kriptovalyuta hackerləri üçün ən uğurlu il oldu. Belə ki, onlar keçən il ərzində ümumilikdə 3.8 milyard dollar dəyərində kriptovalyuta oğurlamışdılar. Bunun üçün onlar əsasən mərkəzləşdirilməmiş maliyyə protokollarından istifadə edirdilər. Bu prosesdə həmçinin Şimali Koreya ilə əlaqəli olan hackerlər də aktiv şəkildə iştirak etmişdilər.