TikTok təhlükəsizlik funksiyasını milyonlarla istifadəçidən qəsdən gizlətməkdə ittiham olunur

    ABŞ senatorları TikTok-dan platformanın tövsiyə alqoritminin təhlükəli məzmun dairələri yaratmasının qarşısını almaq üçün hazırladığı təhlükəsizlik funksiyasını niyə milyonlarla istifadəçidən qəsdən gizlətdiyinə dair izahat tələb ediblər. Məsələ TikTok-un 2021-ci ildə başladığı eksperimentlə bağlıdır. Şirkət “For You” lentində istifadəçilərə eyni kateqoriyadan olan məzmunların ardıcıl və həddindən artıq göstərilməsinin qarşısını alan sistem hazırlamışdı. Məqsəd istifadəçilərin “filter bubble” adlandırılan vəziyyətə, eyni mövzuda oxşar videoların davamlı olaraq tövsiyə edildiyi informasiya dairəsinə düşməsinin qarşısını almaq idi.

    Yayılan məlumatlara görə, TikTok bu təhlükəsizlik mexanizmini bütün istifadəçilər üçün aktivləşdirməyib. Şirkət funksiyanın istifadəçi aktivliyinə necə təsir etdiyini ölçmək üçün milyonlarla hesabı “nəzarət qrupu”nda saxlayıb və həmin istifadəçilərə yeni qoruma mexanizmini təqdim etməyib. TikTok-a senatorların suallarını cavablandırmaq üçün sentyabrın 1-dək vaxt verilib. Blackburn və Blumenthal uzun müddətdir sosial şəbəkələrdə uşaqların və yeniyetmələrin qorunması üçün daha sərt qaydaların tətbiqini müdafiə edir və Kids Online Safety Act (KOSA) qanun layihəsinin əsas tərəfdarları sırasındadırlar.