Amazon-un Leo layihəsi böyüyür

    Technote.az “Engadget” platformasına istinadən bildirir ki, Amazon peyk internet bazarında rəqabəti artırmaq üçün mühüm addım atıb. Şirkət Globalstar şirkətini satın aldığını açıqlayıb. Globalstar xüsusilə Apple cihazlarında istifadə olunan fövqəladə peyk rabitəsi sistemi ilə tanınır və hazırda iPhone ilə Apple Watch modellərində təqdim edilən SOS peyk funksiyasının əsas texnologiya tərəfdaşı hesab olunur.

    Amazon bildirib ki, bu satınalma şirkətin özünün hazırladığı Leo adlı peyk internet layihəsini gücləndirmək məqsədi daşıyır. Leo layihəsi gələcəkdə SpaceX şirkətinin Starlink xidmətinə birbaşa rəqib olacaq. Razılaşmaya əsasən Globalstar Amazon-un peyk infrastrukturuna inteqrasiya ediləcək və bununla da Leo şəbəkəsinin əhatə dairəsi genişlənəcək.

    Ən maraqlı məqamlardan biri isə budur ki, Apple hazırda Globalstar-ın 20 faiz səhminə sahibdir. Şirkət bu payı 2024-cü ildə 1.5 milyard dollar qarşılığında əldə etmişdi. Buna baxmayaraq yeni razılaşma çərçivəsində Apple və Amazon əməkdaşlığı davam etdirəcək. Rəsmi açıqlamada qeyd olunur ki, Leo gələcəkdə də dəstəklənən iPhone və Apple Watch modelləri üçün peyk xidmətlərini təmin etməyə davam edəcək.

    Bundan əlavə, Amazon və Apple gələcək nəsil peyk xidmətlərinin hazırlanması üçün birgə çalışacaqlarını da elan ediblər. Bu isə o deməkdir ki, Apple istifadəçiləri gələcək illərdə daha inkişaf etmiş və daha geniş əhatəli peyk rabitə imkanları əldə edə bilər.