Apple 599$-dan satılacaq büdcəli MacBook-u satışa çıxaracaq

     Apple bu il qiyməti 599$-dan başlayan büdcəli MacBook modelini satışa çıxartmağı planlaşdırır. Məlumata görə, bəzi komponentlərin kütləvi istehsalına 2025-ci ilin üçüncü rübünün sonuna doğru başlanacaq, noutbukların yığılması isə ilin sonuna qədər başlaya bilər. Gözlənilir ki, MacBook-un yekun yığılması dördüncü rübdə Quanta şirkətinin zavodlarında həyata keçiriləcək və noutbuk 2025-ci ilin sonunda və ya 2026-cı ilin əvvəlində satışa çıxacaq. Bu, məşhur analitik Ming-Chi Kuo-nun proqnozuna uyğundur.

     O, iyun ayında Apple-ın 13 düym ölçülü ekrana və A18 Pro prosessoruna sahib MacBook satışa çıxartmağa planlaşdırdığını bildirmişdi. Bu noutbuk, iPhone-larda istifadə olunan eyni prosessora əsaslanan ilk Mac modeli olacaq. Əvvəllər bütün Mac-lar daha çox nüvəyə, artırılmış yaddaş həcminə və xarici ekranlara daha yaxşı dəstəyə malik M seriyalı prosessorlarla təchiz edilirdi. Qeyd etmək lazımdır ki, A18 Pro prosessoru Thunderbolt-u dəstəkləmir, buna görə də yeni MacBook-un USB-C girişləri ilə təchiz olunacağı ehtimal olunur.

     Ming-Chi Kuo-nun məlumatına görə, yenilik ultra nazik və yüngül gövdəyə sahib olacaq və gümüşü, mavi, çəhrayı və sarı rənglərdə təqdim olunacaq. Məlumata əsasən, yeni MacBook-un qiyməti 599-699$ arasında olacaq. Müqayisə üçün, ABŞ-da 13 düym ölçülü ekrana sahib MacBook Air-in qiyməti 999$-dan (və ya Apple-ın tələbələr üçün təqdim etdiyi endirimlə 899$-dan) başlayır. Analitiklərin proqnozlarına görə, büdcəli MacBook-un illik tədarükü 5-7 milyon ədədə çata bilər ki, bu da ümumi MacBook satışlarını ildə 17-18 milyon ədəddən 30-40 % artırmaq potensialına malikdir.