Apple ağıllı ev seriyasını təqdim etdi, Apple TV-ni 4 ildən sonra yenilədi

    “Apple” 13 oktyabrda yeni “Apple Home Collection” seriyasını göstərib. Seriyaya ağıllı kilid, video qapı zəngi, termostat, temperatur sensoru, eləcə də ev və çöl üçün təhlükəsizlik kameraları daxildir. Cihazlar “LG Electronics” və “Schneider Electric” ilə birgə hazırlanıb. Satışlar dekabrda başlayacaq, bəzi məhsullar 2027-ci ilin əvvəlində göndəriləcək.

    “LG Indoor Cam” 199,95 dollara (təxminən 340 manat) satılacaq. Xarici kameranın qiyməti 299,95 dollar (təxminən 510 manat), işıqlı kameranın qiyməti 399,95 dollar (təxminən 680 manat) olacaq. Video qapı zəngi 249,95 dollara (təxminən 420 manat) başa gələcək. Ağıllı kilid 349,95 dollara (təxminən 590 manat) satılacaq. “LG Smart Thermostat” üçün 199,95 dollar qiymət qoyulub. Temperatur sensoru 39,95 dollar (təxminən 68 manat) olacaq. “Schneider Electric” termostatı və otaq sensorunu da bu qiymətlərə satacaq.

    Ağıllı kilid UWB dəstəyi ilə seçilir. Bu simsiz texnologiya istifadəçinin yaxınlaşdığını “Bluetooth”dan daha dəqiq müəyyən edir. Bunun sayəsində qapı “iPhone” və ya “Apple Watch” ilə avtomatik açıla bilir. Video qapı zəngində ziyarətçini və qapı qarşısındakı bağlamaları izləyən 2 kamera var. Zəng çalınanda “HomeView”, “HomePod”, “iPhone” və “iPad” cihazlarına xəbərdarlıq gəlir.

    Yeni “HomeView” cihazı 7 düymlük kvadrat ekrana malikdir. Ekran dinamik altlığın üzərində yerləşir. Cihazın qiyməti 299 dollar (təxminən 510 manat) olacaq. Satışlar 13 noyabrda başlayacaq və cihaz 8 ölkədə əlçatan olacaq. Müstəqil “HomeView Software” sistemində “App Store” işləmir. Bununla belə, “Messages”, “Safari”, “FaceTime” və “Spotify” kimi seçilmiş tətbiqləri açmaq olur. “Siri AI” ilə işləyən cihaz 6 “iCloud” profilini tanıyır. Bütün funksiyalardan yararlanmaq üçün “iPhone 15 Pro” və ya daha yeni model lazımdır.

    Yeni aksessuarları “iPhone”da 1 toxunuşla quraşdırmaq, sonra “Apple Home” tətbiqindən idarə etmək olur. Ayrıca “LG” və ya “Schneider” hesabı açmağa ehtiyac yoxdur. Ev kamerası istifadəçinin içəridə olduğunu müəyyən edəndə məxfiliyi qorumaq üçün aşağı çevrilir. Temperatur sensorları da otaqlar arasındakı temperatur fərqini göstərir. Kameralar ABŞ, Kanada və Böyük Britaniyada satılacaq. Termostatlarla ağıllı kilid yalnız ABŞ və Kanadada satışa çıxacaq.

    “HomePod Mini 2” üçün ilkin sifarişlər açılıb, satışlar 30 oktyabrda başlayacaq. Dinamikin qiyməti 149 dollar (təxminən 250 manat) olacaq. Cihazda S10 prosessoru var və yaşıl, ağ, gecə rəngi, çəhrayı və qara variantlarda satılacaq. “Sound Glow” funksiyası yuxarı hissədəki işıqların rəngini musiqinin üz qabığına uyğun dəyişir. “Siri AI” sonrakı proqram yeniləməsi ilə əlavə olunacaq. Bu funksiyanın işləməsi üçün süni intellekt dəstəkli “iPhone” lazım olacaq.

    “Apple TV 4K” 4 ildən sonra yenilənib. Yeni model 13 noyabrda 299 dollara satışa çıxacaq. Cihaz əvvəlkindən 170 dollar (təxminən 290 manat) bahadır. Modeldə 128 GB yaddaş, simsiz internet bağlantısı, Ethernet girişi və A19 prosessoru var. Yeni pultu “Find My” və UWB ilə tapmaq olur. Pult əvvəlki “Apple TV” modelləri ilə də işləyir. Cihaza 4 ədəd 2-ci nəsil “HomePod” qoşaraq əhatəli səs sistemi qurmaq olur. Belə dəstin qiyməti 1000 dollar (1700 manat) olacaq.