Apple daha yüngül Vision Pro eynəyi üçün 4 dizaynı nəzərdən keçirir

    “Apple” daha yüngül və üzdə iri görünməyən yeni “Vision Pro” hazırlayır. “N224” kod adlı layihə hələ ilkin mərhələdədir və şirkət 4 fərqli dizaynı nəzərdən keçirir. Cihazın 2028-ci ilin sonu ilə 2029-cu ilin əvvəli arasında satışa çıxacağı gözlənilir. Ancaq hazırkı planlar sonradan dəyişə bilər.

    Bu layihə əvvəllər “Vision Air” adı ilə tanınan “N100” modelinin birbaşa davamı deyil. Daha yüngül və ucuz cihaz üçün hazırlanan “N100” layihəsi ötən il dayandırılıb. “N224” isə ucuz model yox, “M5” çipli hazırkı “Vision Pro”nun davamçısı ola bilər. Bununla yanaşı, flaqman xüsusiyyətlərini saxlayıb nisbətən aşağı qiymətə satılması da istisna edilmir.

    Sınaqdan keçirilən variantlardan birində prosessor və batareya ayrıca daşınan kiçik bloka yığılır. “Meta”nın yeni VR eynəyində də oxşar quruluş var. Belə dizayn başa taxılan hissəni yüngülləşdirə bilər. Hazırkı “Vision Pro”da batareya artıq kənardadır, amma prosessorun da ayrıca bloka keçirilməsi daha yaxşı soyutma və enerjidən səmərəli istifadə tələb edir.

    “Apple” rəhbərliyində ayrıca blok ideyasını bəyənməyənlər də var. Onlar bütün hissələrin eyni korpusda qalmasını istəyirlər. Sınaqdakı dizaynlardan biri indiki cihazın yumurtavari formasını qoruyur. Çəkini azaltmaq üçün plastik, titan, başqa metallar və müxtəlif material qarışıqları yoxlanılır. Digər variantda prosessor və batareya eyni xarici qurğuda birləşdirilir.

    Hələlik 4 konseptin hamısının necə qurulduğu açıqlanmayıb. “Apple”ın xarici bloklu eynək formasını, yoxsa hazırkı modelə bənzər vahid korpusu seçəcəyi bəlli deyil. Layihə erkən mərhələdə olduğuna görə satış vaxtı, dizayn və qiymət planları dəyişə bilər. İndiki məlumatlara əsasən, əsas məqsəd cihazı daha yüngül etməkdir.