Apple Pencil dəyişdirilə bilən batareya ilə yenilənə bilər

    Apple-ın 2027-ci ilin ilk yarısında yeni iPad modelləri ilə birlikdə iki yenilənmiş Apple Pencil təqdim edəcəyi bildirilir. Məlumatı Bloomberg agentliyinin jurnalisti Mark Qurman paylaşıb. Məlumata görə, B582 kod adlı model hazırda satışda olan USB-C girişli Apple Pencil-in yenilənmiş versiyası olacaq. B632 kod adlı ikinci model isə Apple Pencil Pro-nun yeni nəsli kimi hazırlanır.

    Ən diqqətçəkən yenilik isə cihazların təmir olunmasının asanlaşdırılması ola bilər. Bildirilir ki, Apple Avropa İttifaqının istehlakçı elektronikasında batareyaların daha rahat dəyişdirilməsini tələb edən yeni qaydalarına uyğunlaşmaq üçün Apple Pencil dizaynında dəyişikliklər üzərində işləyir. Bu isə gələcək modellərdə dəyişdirilə bilən və ya daha asan servis edilə bilən batareyanın istifadə olunmasına imkan yarada bilər.

    Hazırkı Apple Pencil modelləri təmir baxımından ən uğursuz cihazlardan hesab olunur. iFixit tərəfindən aparılan qiymətləndirmələrdə bütün Apple Pencil modelləri daxili batareyanın dəyişdirilməsinin demək olar ki, mümkünsüz olması səbəbindən "təmir edilə bilməyən" cihazlar kimi qiymətləndirilib.