Apple Rusiyada App Store ödənişlərini tam dayandırdı

    Technote.az “Apple Insider” platformasına istinadən bildirir ki, Apple şirkəti Rusiyada App Store və digər Apple xidmətləri üçün bütün ödəniş əməliyyatlarını dayandırdığını açıqlayıb. Bu qərardan sonra Rusiyadakı istifadəçilər artıq yeni tətbiq ala, tətbiqdaxili alış edə və ya Apple Music, Apple TV+, Apple Fitness+ kimi xidmətlərə abunəliklərini yeniləyə bilməyəcəklər.

    Məsələnin səbəbi Apple-ın sanksiya qaydalarını pozmaqda ittiham olunması ilə bağlıdır. Bildirilir ki, Apple İrlandiya Rusiyalı tətbiq istehsalçılarına ödənişlər etdiyi üçün tənzimləyici qurumlar tərəfindən sanksiyaların pozulması kimi qiymətləndirilən vəziyyət yaranıb. Buna görə də Apple Rusiyada bütün ödəniş emalını dayandırmaq qərarı verib.

    Digər tərəfdən, Rusiyanın Rəqəmsal İnkişaf Nazirliyi də mobil operatorlara Apple hesablarına balans yükləmə imkanını bağlamaq göstərişi verib. Daha əvvəl istifadəçilər mobil operator vasitəsilə Apple hesabına pul yükləyərək sanksiyaları müəyyən qədər dolana bilirdilər. Bu imkanın da bağlanması ilə artıq Rusiyada Apple hesabına pul əlavə etmək mümkün deyil. Nəticədə, istifadəçilərin aktiv abunəlikləri yalnız ödəniş dövrünün sonuna qədər işləyəcək. Hesabdakı mövcud balans bitdikdən və ya abunə müddəti başa çatdıqdan sonra isə xidmətlərə giriş dayandırılacaq. Bu məhdudiyyət App Store tətbiqləri ilə yanaşı Apple Music, Apple TV+, Apple Fitness+ və Apple One paketinə də aiddir.