Apple yeni Apple TV 4K media pleyerini təqdim etdi: hər tətbiqə 2 GB RAM

    “Apple” yeni 4-cü nəsil “Apple TV 4K” modelinə “A19” çipi qoyub. Qurğuda 128 GB daxili yaddaş və 8 GB RAM var. Operativ yaddaş əvvəlki modeldən 2 dəfə çox olsa da, tətbiqlər bundan tam yararlana bilmir. Model 299 dollara (təxminən 510 manat) satılır. Ehtimala görə, yaddaş çiplərinin tədarükündəki çətinlik qiymətin artmasına təsir edib.

    Məhdudiyyət “tvOS” əməliyyat sistemi ilə bağlıdır. Sistem hər tətbiq üçün 2 GB RAM həddi qoyur və yeni modeldə də bu dəyişməyib. Tətbiq daha çox operativ yaddaş ayırmağa çalışarsa, sistem onu məcburi bağlayır. Proqramçılara istifadəyə açıq yaddaşı göstərən “os_proc_available_memory” funksiyası da əvvəlki nəsildəki kimi 2 GB limit göstərir.

    Bu limit video platformalarının tətbiqləri üçün ciddi problem deyil, çünki onlar adətən az RAM işlədir. Ancaq “Apple” qurğunu oyun üçün də tanıtdığından, ağır qrafikalı oyunlarda vəziyyət dəyişir. Belə oyunlar 2 GB həddinə asanlıqla çata bilər. Daha güclü çipə və 2 dəfə çox RAM-a baxmayaraq, hazırkı proqram təminatı oyunlara əlavə yaddaş ayırmır.

    Qurğudakı 128 GB daxili yaddaşın hamısını tək bir tətbiq və ya oyun üçün işlətmək də olmur. “tvOS” tətbiqin əsas quraşdırma fayllarını təxminən 4 GB ilə məhdudlaşdırır. Əlavə fayllar üçün təxminən 20 GB yer ayırmaq olur. Yəni ümumi yaddaş artsa da, böyük oyunların quraşdırılması və işləməsi yenə sistemin qoyduğu limitlərdən asılıdır.

    8 GB RAM-ın bir hissəsinin “Siri” süni intellekt modelləri üçün saxlanıldığı ehtimal olunur. Ancaq bunu təsdiqləyən rəsmi açıqlama yoxdur. “Siri”nin daha mürəkkəb hesablamaları qoşulmuş “iPhone”da və ya serverdə aparılır. Eyni funksiyalar əvvəlki 2 nəsildə də işləyir. Müxtəlif “Apple” cihazlarında AAA oyunlarını işə salmağa çalışan həvəskarlar da gözlədikləri əlavə RAM-dan hələ yararlana bilməyiblər.