Apple iOS 27.2 yeniləməsini təqdim etdi: 6 tətbiqə yeni imkanlar gəldi

    “Apple” “iOS 27.2” yeniləməsini çıxarıb və 6 tətbiqə yeni imkanlar əlavə edib. Əsas yeniliklərdən biri “Messages” tətbiqində işləyən “Suggested Actions” funksiyasıdır. Yazışmanın məzmununa baxan funksiya təqvimdə tədbir və ya xatırlatma yaratmağı, həmçinin qeydə məlumat əlavə etməyi təklif edir. Yayda sınaq versiyasında görünən, amma ümumi versiyaya daxil edilməyən funksiya indi təkmilləşdirilib. İstifadəçi hansı təklifləri görmək istədiyini də seçə bilər.

    “Apple TV” tətbiqində profil seçimi “iOS 27.2” və “iPadOS 27.2” yeniləmələri ilə “iPhone” və “iPad” cihazlarına gəlib. Eyni hesabdan istifadə edən şəxslər artıq baxış tarixçəsini və tövsiyələri ayrı saxlaya biləcəklər. Tətbiq açılanda profil seçimi görünəcək, amma bunu ayarlardan söndürmək olar. Funksiya telefonunu uşaqlar və ya ailə üzvləri ilə paylaşanlar üçün faydalı ola bilər.

    “FaceTime”dəki “Dual Capture” funksiyası artıq qrup zənglərində də işləyir. Uyğun “iPhone” modellərində ön və arxa kameranı eyni vaxtda açmaq olur. Beləliklə, istifadəçi həm özünü, həm də qarşısındakı görüntünü zəng iştirakçılarına göstərə bilir. “iPhone 17” və daha yeni modellərdə kameranı çevirmə düyməsinə toxunduqda hər iki görüntü avtomatik birlikdə yayımlanır.

    “Home” tətbiqinə uyğun ağıllı qıfıllar üçün 2 yeni funksiya əlavə olunub. “Lock After Closing” ilə qapının bağlandıqdan nə qədər sonra avtomatik kilidlənəcəyini seçmək olur. Əvvəllər bu vaxt qapının kiliddən çıxarıldığı andan hesablanırdı. “Door Left Open” isə qapı seçilən müddət ərzində açıq qalarsa istifadəçiyə avtomatik bildiriş göndərir.

    “Apple Podcasts” tətbiqindəki “Up Next” növbəsi 2 ayrı hissəyə bölünüb. “New Episodes” istifadəçinin izlədiyi verilişlərin yalnız ən yeni buraxılışlarını göstərir. “Continue Playing” isə başlanmış, amma sona qədər dinlənilməmiş epizodları bir yerdə toplayır. Beləliklə, yeni məzmunu yarımçıq qalan epizodlardan ayırmaq daha asan olacaq.

    “Games” tətbiqinin əsas səhifəsində endirilmiş, amma hələ açılmamış oyunlar da görünür. Əvvəllər burada yalnız istifadəçinin oynamağa başladığı oyunlar göstərilirdi. Nailiyyətlər üzrə irəliləyişi və lider cədvəlindəki xalları izləmək də asanlaşdırılıb. “Friends” bölməsi dost təkliflərinin niyə göstərildiyini açıqlayır. Dostların oyunçu səhifələrində onların son oynadığı oyunlar da görünür.