Digital Storm-un yığdığı kompüterdə RTX 5090 videokartının kabeli əriyib

    “Digital Storm” şirkətinin yığdığı “Corsa” masaüstü kompüterində “GeForce RTX 5090” videokartının enerji bağlantısı əriyib. Anthony DeMarconun atası kompüteri vergidən əvvəl 5245 dollar (təxminən 8920 manat) qiymətinə alıb. Sistem 2025-ci ilin mayında çatdırılıb, ancaq qısa sınaqdan sonra qutusunda saxlanılıb. Kompüter 2026-cı ilin avqustunda işlədilməyə başlanıb. Təxminən 2 həftə sonra yanıq iyi gəlib və monitordakı görüntü titrəməyə başlayıb.

    Kompüterdə “AMD Ryzen 9 9950X” prosessoru, 2 TB “Crucial T700 Pro” SSD yaddaşı və 64 GB “Kingston Fury RGB” operativ yaddaş var. “PNY GeForce RTX 5090” videokartı 1000 Vt gücündə, “80 Plus Gold” sertifikatlı enerji blokuna qoşulub. Kabel həm videokart, həm də enerji bloku tərəfdə əriyərək girişə yapışıb. Enerji blokundakı zədə daha ciddi olub, kabelin hər iki ucunda açıq naqillər qalıb.

    “Digital Storm” hissələrə 1 il, kompüterin yığılmasına isə 3 il zəmanət verir. Sistem uzun müddət qutuda qaldığı üçün hissələrin zəmanət müddəti bitib. “PNY” öz “GeForce RTX” videokartlarına 3 il zəmanət verir. DeMarco 26 avqustda “Digital Storm”a, 8 sentyabrda “PNY”yə müraciət edib. Ancaq hər iki tərəf problemin həllinə görə digər tərəfin məsuliyyət daşıdığını deyib.

    “PNY”yə görə, 16 kontaktlı enerji bağlantısında yalnız videokartın qutusundan çıxan kabel və ya adapter zəmanətə daxildir. Hazır kompüterdə isə “Digital Storm”un öz kabeli işlədilib. “PNY” səlahiyyətli şirkətlərin yığdığı kompüterlərə dəstək verdiyini, ancaq onların seçdiyi bütün kabellərə zəmanət vermədiyini açıqlayıb. DeMarco 16 sentyabrda İstehlak Məhsullarının Təhlükəsizliyi Komissiyasına şikayət göndərib. Bundan sonra “PNY” işi yenidən araşdıracağını deyib.

    DeMarco videokartın dəyişdirilməsini yox, pulunun geri qaytarılmasını istəyir. O, eyni modeldən yenidən istifadə etməyi təhlükəsiz saymır. “PNY”də ödənişli təmir xidməti də yoxdur. 12VHPWR adlı enerji bağlantısının əriməsi daha əvvəl müxtəlif istehsalçıların “RTX 4090” və “RTX 5090” modellərində də qeydə alınıb. Bu bağlantı standartını hazırlayan “PCI-SIG” hələ 2022-ci ildə istehsalçıları təhlükəsizlik sınaqlarını gücləndirməyə çağırmışdı.