RTX 5090 videokartının DLSS 5 ilə sərfiyyatı 658 Vt, konnektoru 91,7°C olub

    “Nvidia GeForce RTX 5090 Founders Edition” üzərində aparılan sınaq göstərib ki, DLSS 5 enerji sərfiyyatını və temperaturu xeyli artırır. Videokart ən yüksək anda 658 Vt enerji işlədib. Ölçmə zamanı 16 pinli konnektorda 646,7 Vt qeydə alınıb. Konnektorun ən isti hissəsi 91,7°C-yə çataraq qrafik prosessordan da çox qızıb.

    Sınaq temperaturun 27,5°C olduğu nəzarətli şəraitdə 20 dəqiqə davam edib. “Cyberpunk 2077” oyunu 4K görüntü ölçüsündə, yüksək qrafik parametrləri və DLSS Quality rejimində işlədilib. Yoxlamada “GeForce RTX 5090 Founders Edition”, “Asus ROG Astral GeForce RTX 5090” və “GeForce RTX 5080 Founders Edition” modelləri sınaqdan keçirilib. Əsas diqqət videokarta enerji ötürən 16 pinli konnektora ayrılıb.

    DLSS 5 söndürüləndə “RTX 5090” konnektorunun kilid olan tərəfi 77,1°C, digər tərəfi 80,9°C olub. Texnologiya işə salındıqda kilid tərəfi 83,4°C-yə, digər tərəf isə 91,7°C-yə qədər qızıb. Qrafik prosessorun orta temperaturu 79,4°C-dən 83°C-yə yüksəlib. “RTX 5080” modelində konnektor daha az qızıb və ən çox 52,2°C olub.

    “HWiNFO” proqramının məlumatına görə, DLSS 5 işə salındıqda “RTX 5090”-ın orta enerji sərfiyyatı 509,2 Vt-dan 575,1 Vt-a qalxıb. “RTX 5080” modelində göstərici 298,2 Vt-dan 350,3 Vt-a yüksəlib. Dövrə lövhəsi üzərindən birbaşa ölçmə aparan “PCAT” aləti “RTX 5090” üçün orta hesabla 593,9 Vt sərfiyyat qeydə alıb. Ən yüksək göstərici 658 Vt olub. Hər iki ölçmə üsulunda enerji sərfiyyatı təxminən 13% artıb.

    “Asus ROG Astral RTX 5090” modelində konnektorun 6 enerji pinindən keçən elektrik cərəyanı da ayrıca ölçülüb. DLSS 5 söndürüləndə göstərici 6,94-7,47 A arasında dəyişib. Texnologiya işə salındıqda cərəyan 7,83-8,51 A aralığına qalxıb. “PCI-SIG” standartına görə, hər pin üçün yuxarı hədd 9,2 A-dır. Pinlərdən biri işləmədikdə DLSS 5 cərəyanı 10,1 A-ya çatdırıb. Beləliklə, standart hədd 10% aşılıb.

    Daha yüksək enerji limiti olan “GeForce RTX 5090 32G Lightning Z” modelində artım daha böyük olub. DLSS 5 ilə enerji sərfiyyatı 1080p görüntüdə 592 Vt-a, 1440p-də 695 Vt-a yüksəlib. 4K görüntüdə göstərici 848 Vt-a qədər çatıb. 16 pinli konnektor boş qoşulduqda elektrik yükü qalan pinlər arasında bölünür və belə artım ərimə riskini yüksəldə bilər. DLSS 5 sınağı zamanı konnektorun əriməsi ilə bağlı ən azı 1 istifadəçi hadisəsi də qeydə alınıb.