Dünyanın 1000 Hz-lik təsvir yenilənməsinə sahib 4K keyfiyyətli ilk monitoru təqdim edilib

     TCL şirkəti DisplayWeek 2024 konfransı çərçivəsində qeyri-adi monitorunu təqdim edib. Təqdim edilmiş monitorun qeyri-adiliyi isə ondadır ki, o, dünyanın 1000 Hz-lik təsvir yenilənməsinə sahib 4K keüyfiyyətli ekrana sahib ilk monitoru olub. Lakin bu mövzuda kiçik bir nüans var. Məsələ burasındadır ki, TCL-in təqdim etmiş olduğu monitorda 1000 Hz-lik təsvir yenilənməsi göstəricisi aparat təminatı səviyyəsində deyil, xüsusi proqram təminatı texnologiyası vasitəsilə əldə edilib. Məlumatda qeyd edilib ki, monitor ekranının 1000 Hz-lik təsvir yenilənməsi göstəricisini əldə etməsi üçün NVIDIA Ultra Low Motion Blur 2 (ULMB 2) adlı texnologiyadan istifadə edilib.

     Bu texnologiya PWM (Pulse-width modulation) işıqlandırmasının çalışma tezliyini yüksəldir. Bunun hesabına ekranda heç bir bulanıq effekti olmadan parlaq və keyfiyyətli görüntü əks olunur. TCL bildirib ki, 360 Hz-lik təsvir yenilənməsinə sahib monitorda ULMB 2 texnologiyası təsvir yenilənməsi göstəricisini proqram təminatı səviyyəsində 1440 Hz-ə qaldıra, 250 Hz-lik təsvir yenilənməsinə sahib monitorda isə 1000 Hz-ə qaldıra bilər. TCL öz yeni monitorunun əsl təsvir yenilənməsi göstəricisini açıqlamayıb. Monitorun nə zaman və hansı qiymətə satışa çıxacağı da bilinmir.