Dünyanın ən yüngül 14 düym ekranlı Fujitsu FMV Zero WU5/J3 noutbuku təqdim edilib - QİYMƏTİ

     Fujitsu şirkəti dünyanın ən yüngül 14 düym ekranlı noutbukunu təqdim edib. Şirkətin bu noutbuku Fujitsu FMV Zero WU5/J3 adlanır. Şirkət bildirib ki, sözügedən yeni noutbukun çəkisi cəmi 634 qramm təşkil edir. Bununla belə onun gövdəsi karbon lifindən hazırlanıb və o, MIL-STD-810H hərbi standartının tələblərinə cavab verir. Bu o deməkdir ki, noutbukun gövdəsi düşüşlərə, zərbələrə və təzyiqə dözümlüdür. Fujitsu FMV Zero WU5/J3 noutbuku 14 düym ölçülü maye kristallik ekranla təchiz olunub. Noutbuk iki versiyada təqdim olunub.

     Birinci versiya Intel Core Ultra 5 125U prosessoru vasitəsilə, ikinci versiya isə Core Ultra 7 155U prosessoru vasitəsilə çalışır. Hər iki versiya özündə 64 GB-a kimi RAM ilə 2 TB-a kimi SSD-ni birləşdirir. Üstəlik prosessordan asılı olmayaraq hər iki versiya süni zəka tapşırıqlarının yerinə yetirilməsi istiqamətində neyron çipinə sahibdir. Şirkət bildirib ki, noutbuk bir dəfə şarj olunandan sonra 6-11 saat ərzində çalışa bilir. Fujitsu FMV Zero WU5/J3 özündə USB Type-A, USB Type-C, HDMI, Ethernet girişlərini, microSD girişini və naqilli qulaqlıqlar üçün nəzərdə tutulmuş 3.5 mm-lik audio girişi birləşdirir. Noutbuk noyabr ayında satışa çıxacaq və onun qiyməti 1325$-dan start götürəcək.