Google Android üçün AirDrop dəstəyini genişləndirir

    Technote.az "Ars Technica” platformasına istinadən bildirir ki, Google Android ekosistemi üçün AirDrop dəstəyini genişləndirməyə hazırlaşır. Şirkət ötən il ilk dəfə bu funksiyanı Pixel 10 seriyasında təqdim etmişdi və indi açıqlanan yeni məlumata görə, 2026-cı ildə daha çox Android telefon bu imkana sahib olacaq.

    Hazırda Apple cihazları ilə birbaşa AirDrop vasitəsilə fayl göndərə bilən yeganə Android modelləri Pixel 10 seriyasıdır. Lakin Android Authority-nin məlumatına əsasən, Google bu funksiyanı bütün Android ekosisteminə yaymaq üçün ciddi hazırlıqlara başlayıb.

    Əslində Android-də uzun müddətdir AirDrop-a bənzər Quick Share (əvvəllər Nearby Share) funksiyası mövcuddur. Ancaq bu funksiya Apple AirDrop ilə uyğun deyildi. Məsələ 2024-cü ilin sonunda Avropa İttifaqının Apple-ı Wi-Fi Aware standartını dəstəkləməyə məcbur etməsindən sonra dəyişdi. Bu addım Google-a Apple-la birbaşa əməkdaşlıq etmədən uyğunluq yaratmağa imkan verdi.

    Google həmçinin Quick Share üçün Play Store üzərindən yenilənə bilən ayrıca modul (APK) əlavə edib. Bu isə o deməkdir ki, gələcəkdə AirDrop dəstəyi daha sürətli şəkildə müxtəlif Android modellərinə yayıla bilər. Qeyd edək ki, funksiyanın işləməsi üçün Apple istifadəçiləri AirDrop-da “Everyone for 10 minutes” seçimini aktiv etməlidir. Kontakt əsaslı paylaşım isə hələlik Android üçün əlçatan deyil və bunun dəyişəcəyi gözlənilmir.