Google iPhone-la işləyən ağıllı eynəklərini təqdim etdi: 670 manatdan

    “Google” 12 noyabrda “Android XR” platformasında işləyən “Intelligent Eyewear” ağıllı eynəklərini təqdim edib. “Made for iPhone” sertifikatı alan cihaz “iOS” ilə də rəsmi işləyir. Eynəkləri “Samsung”, çərçivələri isə “Gentle Monster” və “Warby Parker” hazırlayıb. Ümumilikdə 30 fərqli dizayn var.

    Eynəklərin çəkisi çərçivəyə görə 40-44 qram arasında dəyişir. Cihazda geniş sahəni çəkən 12 MP kamera, 4 mikrofon və qulaqları bağlamadan səs verən 2 dinamik var. Səsli idarəetmə “Hey Gemini” əmri ilə işə düşür. Toxunma paneli basma və sürüşdürmə hərəkətlərini tanıyır, fiziki düymə ilə bütün ağıllı funksiyaları söndürmək olur.

    “iOS” üçün hazırlanmış “Glasses” tətbiqi görüntünün işıqlı və qaranlıq hissələrini balanslaşdırır. Foto və 90 saniyəyədək videolar “Apple Photos” kitabxanasında saxlanılır. “Wi-Fi Aware” texnologiyası faylları sürətlə telefona köçürür. Cihazdan istifadə üçün iPhone 13 Pro və daha yeni model lazımdır. “Gemini” zəng edə, şəxsi mesaj və “iMessage” göndərə, həmçinin bildirişləri göstərə bilir.

    “Intelligent Eyewear” foto və ya sonradan baxmaq üçün video çəkəndə ağ çəkiliş indikatoru yanır. İşıq örtülsə və ya xarab olsa, kamera dayanır. Vizual axtarış və tərcümə zamanı indikator yanmır. Səbəb odur ki, “Gemini” üçün çəkilən görüntülər istifadədən dərhal sonra silinir və tarixçədə qalmır. “Google”un məlumatına görə, bu materiallardan süni intellektin öyrədilməsi və reklam üçün istifadə olunmur. Telefon üzləri gizlədir, kənar səsləri də süzgəcdən keçirir.

    “Android XR” şarj zamanı indikatorun işləyib-işləmədiyini avtomatik yoxlayır. Nasazlıq aşkarlananda kamera sönür. Canlı tərcümə istifadəçinin qarşısındakı 60 dərəcəlik sahəyə fokuslanır və digər səsləri azaldır. Əmrdən kamera istifadəsinin istənilib-istənilmədiyi aydın olmadıqda, “Gemini” əlavə təsdiq istəyir. “Google” həmçinin video çəkilişini 90 saniyə ilə məhdudlaşdırıb.

    İlk quraşdırma zamanı istifadəçi başqalarını icazəsiz çəkməyəcəyinə, həssas məkanlarda qeyd aparmayacağına və indikatoru örtməyəcəyinə razılıq verməlidir. “Google Shopping” və “Google Ads” indikatoru gizlədən aksessuarların satışını və reklamını qadağan edir. “Google Play” sosial şəbəkələrdə canlı yayım edən, üzləri real vaxtda tanıyan və indikatorun işini dəyişən tətbiqlərə icazə vermir. Cihazı yalnız 18 yaşdan yuxarı şəxsin “Google” hesabı ilə aktivləşdirmək olar.

    Eynəklər bir dolumla 9 saat işləyir. Şarj qutusu onları əlavə 7 dəfə tam doldura bilir. “Warby Parker” modelləri 3 çərçivə dizaynında satışa çıxacaq və qiyməti 395 dollardan (təxminən 670 manat) başlayacaq. ABŞ və Cənubi Koreyada satılacaq “Gentle Monster” modelləri 449 dollardan (təxminən 760 manat) başlayır. İlkin sifarişlər 12 noyabrda açılıb, pərakəndə satış 10 dekabrda başlayacaq.