Google Maps-də xizək mövsümü yenidən başlayıb

    Technote.az “TechRadar” platformasına istinadən bildirir ki, qış mövsümünün başlaması ilə Google Maps xizək və snoubord həvəskarlarını sevindirən mühüm bir yeniliyi geri qaytarıb. Bir ildən artıq fasilədən sonra platformada yenidən xizək trasları, kanat yolları (liftlər) və xizək mərkəzlərinə aid obyekt nişanları görünməyə başlayıb. Əvvəllər Google Maps xizək tətilini planlaşdıran istifadəçilər üçün olduqca faydalı idi. Lakin Google 2024-cü ilin oktyabrında bu funksiyanı ləğv etmiş və bunu belə izah etmişdi: şirkətin fikrincə, istifadəçilərin əksəriyyəti bu tip məlumatlar üçün Google Maps-dən yox, birbaşa xizək mərkəzlərinin öz xəritələrindən istifadə etməyə üstünlük verirdi, çünki bu mənbələr daha etibarlı sayılırdı.

    Bu qərar xizək və snoubord sevərlərin narazılığına səbəb olmuşdu. Google Maps-dəki tras məlumatlarından asılı olan istifadəçilər hətta petisiya başladaraq təxminən 3 min imza toplamışdılar. Nəticədə Google geri addım atıb. Şirkət POWDER xizək saytına verdiyi açıqlamada bildirib: “Bir çox istifadəçinin Google Maps-də xizək məlumatlarını darıxdığını gördük və bu qış mövsümündə liftləri və trasları yenidən qaytarırıq”.

    Bu dəfəki yenilənmə əvvəlkilərdən daha təkmilləşdirilmiş formada təqdim olunur. Google yeni peyk və hava görüntülərindən, eləcə də birbaşa xizək mərkəzlərindən alınan məlumatlardan istifadə edərək xəritələri yeniləyib. Bunun sayəsində köhnə və artıq istifadə olunmayan tras marşrutları düzəldilib. Eyni zamanda, istifadəçilər trasların harada bitdiyini və liftlərin onları hansı nöqtədə endirdiyini də dəqiq görə bilirlər.