Google şirkəti Google I/O 2023 konfransı çərçivəsində ilk qatlana bilən smartfonu Pixel Fold ilə yanaşı həmçinin Pixel 7a smartfonunu da təqdim edib. Təqdim edilmiş Pixel 7a modeli xarici görünüşcə demək olar keçən ilki Pixel 7 ilə eynidir. Lakin yeni smartfonda ekran ölçüsü bir qədər kiçikdir. Belə ki, Pixel 7a smartfonu 90 Hz-lik təsvir yenilənməsinə sahib Full HD+ keyfiyyətli 6.1 düym OLED ekran ilə təchiz olunub. Ekranın yuxarı mərkəz hissəsində isə ön kamera üçün kiçik dairəvi çıxıntı yerləşdirilib. Barmaq izi skanı texnologiyası da birbaşa ekrana inteqrasiya edilib. Smartfonun gövdəsi IP67 standartı üzrə sudan qorunur.

    Smartfon özündə stereo səsgücləndiriciləri və kontaktsız ödənişlər üçün nəzərdə tutulmuş NFC çipi birləşdirir. Əsas texniki göstəricilərə gəldikdə isə smartfon Google Tensor G2 prosessoru, 8 GB RAM, 128 GB daxili yaddaş həcmi, 64 MP + 13 MP ikili arxa kamera, 13 MP-lik ön kamera və 20 vatt gücündə sürətli şarj texnologiyalı 4385 mAh enerji tutumlu batareya ilə təchiz olunub. Smartfon həmçinin 18 vatt gücündə sürətli naqilsiz şarj texnologiyasının dəstəyinə də sahibdir. Pixel 7a Android 13 vasitəsilə çalışır. Onu da qeyd etmək lazımdır ki, smartfonun komplektində şarj adapteri yoxdur. Qutuda yalnız USB Type-C naqili mövcuddur. Buna görə də alıcılar şarj adapterini ayrıca almalı olacaqlar. Pixel 7a artıq 500$ qiymətində satışa çıxıb.