GTA VI-nın 27 dəqiqəlik geniş təqdimatı yayımlandı

    Rockstar Games daha əvvəl söz verdiyi kimi, Grand Theft Auto VI (GTA VI) üçün hazırladığı geniş təqdimat videosunu rəsmi olaraq YouTube kanalında və öz saytında yayımlayıb. Təxminən 27 dəqiqə davam edən video ilk olaraq Netflix-də nümayiş etdirilmişdi. İndi isə təqdimat daha geniş auditoriya üçün YouTube-da əlçatandır. Rockstar-ın məlumatına görə, videoda göstərilən bütün görüntülər oyunun PlayStation 5 versiyasından çəkilib.

    Təqdimat klassik oyun treylerindən daha çox film atmosferini xatırladır. Videoda GTA VI-nın əsas qəhrəmanları Jason Duval və Lucia Caminos, onların hekayəsi, eləcə də oyunun keçdiyi müxtəlif məkanlar ön plana çıxarılır. Rockstar hələlik konkret oyun mexanikalarını bütün detalları ilə nümayiş etdirməsə də, videoda real oyun prosesindən bəzi səhnələr də yer alıb. Bunların arasında silahlı qarşıdurmalar, polisdən avtomobillə qaçış, basketbol oynamaq və sualtı dalış kimi fəaliyyətlər var.

    GTA VI-nın 19 noyabr 2026-cı ildə satışa çıxarılması planlaşdırılır. Oyunun başlanğıc qiyməti isə 79,99 dollar olacaq.