Honor şirkəti bu ayın əvvəlində Berlində keçirilmiş IFA 2023 sərgisi çərçivəsində Honor V Purse adlı yeni qatlana bilən smartfonunu təqdim etdi. Bu qatlana bilən smartfonun şirkətin digər qatlana bilən smartfonlarından əsas fərqləndirici tərəfi ondadır ki, o, daxili istiqamətə deyil, xarici istiqamətə qatlanır. Bundan əlavə olaraq smartfonu xüsusi kəmərlər vasitəsilə kiçik çanta kimi gəzdirmək olar. Honor V Purse smartfonunun rəsmi şəkildə satışa çıxıb-çıxmayacağı bilinmirdi.

    Onun ümumiyyətlə konseptual bir smartfon olduğu düşünülürdü. Lakin məlum olub ki, Honor sözügedən yeni qatlana bilən smartfonunu rəsmi şəkildə Çində satışa çıxardacaq. Şirkət tərəfindən təqdim edilmiş posterə əsasən Honor V Purse 19 sentyabr tarixində satışa çıxacaq. Çox güman ki, məhz həmin gündə şirkət bu qatlana bilən smartfonun texniki göstəricilərini də təqdim edəcək. Bəzi məlumat sızıntılarına inansaq, Honor V Purse smartfonu Snapdragon 778G prosessoru vasitəsilə çalışacaq və 33 vatt gücündə sürətli şarj texnologiyasını dəstəkləyəcək.