Huawei şirkəti Mate X5 adlı yeni qatlana bilən smartfon ilə yanaşı həmçinin Mate 60 smartfon seriyasının da yeni modelini təqdim edib. Söhbət Mate 60 Pro+ modelindən gedir. Xarici görünüşcə bu smartfon Mate 60 Pro-ya bənzəyir. Bununla belə o, bəzi texniki göstəricilər baxımından adi Mate 60 Pro-dan fərqlənir. Beləliklə Mate 60 Pro+ smartfonu 120 Hz-lik təsvir yenilənməsinə sahib 2720x1260 piksel keyfiyyətli 6.82 düym OLED ekranla təchiz olunub. Ekran Kunlun Glass 2 qoruyucu şüşəsi ilə əhatə olunub.

    Adi Mate 60 Pro-da olduğu kimi Mate 60 Pro+ modelində də ekran üzərində dairəvi formalı 3 ədəd çıxıntı yerləşib. Onlardan biri ön kamera, digəri üz skanı üçün nəzərdə tutulub. Üçüncü dairəvi çıxıntının nəyə yaradığı bilinmir. Barmaq izi skanı texnologiyası da birbaşa ekrana inteqrasiya edilib. Smartfonun gövdəsi IP68 standartı üzrə sudan qorunur və özündə stereo səsgücləndiricilər ilə kontaktsız ödənişlər üçün nəzərdə tutulmuş NFC çipi birləşdirir.

    Əsas texniki göstəricilər baxımından Mate 60 Pro+ smartfonu Kirin 9000s prosessoru, 16 GB RAM, 512 GB/1 TB daxili yaddaş həcmi, 48 MP + 48 MP + 40 MP üçlü arxa kamera, 13 MP-lik ön kamera və 88 vatt gücündə sürətli şarj texnologiyalı 5000 mAh enerji tutumlu batareya ilə təchiz olunub. Smartfon həmçinin 50 vatt gücündə sürətli naqilsiz şarj texnologiyasını və 20 vatt gücündə ikitərəfli şarj texnologiyasını dəstəkləyir. Huawei bu yeni smartfonun nə zaman satışa çıxacağı və hansı qiymətə satılacağı barəsində məlumatları daha sonra təqdim edəcək.