Huawei Mate XT 2-ni təqdim etdi: smartfon 2 tərəfdən içəri qatlanır

    “Huawei” sentyabrın 7-də Çində 3 hissədən qatlanan 3-cü smartfonunu - “Mate XT 2”-ni təqdim edib. Əvvəlki modellərdən fərqli olaraq, yeni cihazın ekranının hər 2 tərəfi içəriyə qatlanır. Bu, həm də qatlanan smartfonlar arasında məxfiliyi qoruyan OLED ekranlı ilk modeldir. “Mate XT 2”-nin başlanğıc qiyməti 19 999 yuan, yəni təxminən 3000 dollar (5100 manat) təşkil edir.

    İlk “Mate XT” 2024-cü ilin sonunda Çində, bir neçə ay sonra isə beynəlxalq bazarda satışa çıxmışdı. Onun qarmon kimi qatlanan ekranı ayrıca xarici ekrana ehtiyacı aradan qaldırırdı. Ancaq həssas ekranın bəzi hissələri daim açıq qalırdı. Sonrakı “Mate XTs” modelində də eyni quruluş saxlanılmışdı. “Mate XT 2”-nin 10,2 düymlük elastik ekranının hər 2 tərəfi isə içəriyə qatlanır və beləliklə qorunur.

    Yeni modelin əsas fərqlərindən biri məxfilik rejimli OLED ekrandır. Bu sistem “Samsung”-un bu il “Galaxy S26 Ultra”-ya əlavə etdiyi həllə bənzəyir. Rejim aktivləşdirildikdə ekranın işığı yalnız dar bucaq altında görünür. Buna görə ekran qarşıdan normal oxunsa da, yandan baxanlara demək olar qara görünür.

    Məxfilik ekranı yalnız 16 GB RAM və 1 TB yaddaşı olan versiyada təklif edilir. Bu seçim üçün əlavə 1000 yuan ödəmək lazımdır. Şirkətin təxmini hesablamasına görə, bu, 150 dollar (255 manat) edir. Standart ekranlı versiyalarda məxfilik funksiyası olmayacaq.

    “Mate XT 2” yeni “Kirin 9050 Pro” prosessoru ilə işləyir. Cihaz IP59 qoruma səviyyəsinə sahibdir və əvvəlki modellərdən daha davamlı su qoruması təqdim edir. Arxa hissədə 3 kamera yerləşir. “Huawei” smartfonun Çin xaricində satışa çıxarılıb-çıxarılmayacağını hələ açıqlamayıb.

    Yeni qatlanma quruluşu “Samsung”-un ötən il təqdim etdiyi “Galaxy Z TriFold” modelindəki həllə bənzəyir. Həmin smartfon satışa çıxarıldıqdan qısa müddət sonra istehsaldan çıxarılmışdı. Buna baxmayaraq, yayılan məlumatlara əsasən, “Samsung” 3 hissədən qatlanan yeni model üzərində işləməyə davam edir.