Intel çipli Google noutbuklarında bəzi Android tətbiqləri zəif işləyə bilər

    “Google” yeni “Googlebook” noutbuklarının satışa çıxdığı gün Intel prosessorlu modellərdə bəzi “Android” tətbiqlərinin yaxşı işləməyə biləcəyini etiraf edib. Şirkət indiyədək cihazlarda “Play Store” kitabxanasındakı bütün tətbiqlərin açıq olduğunu vurğulayırdı. İndi məlum olub ki, bütün tətbiqləri yükləmək olur, amma onların işləmə səviyyəsi modeldən asılı olaraq dəyişir.

    “Google”un məlumatına görə, “Android” tətbiqlərinin böyük əksəriyyəti həm “Intel”, həm də “Qualcomm” prosessorlu “Googlebook” cihazlarında əlavə düzəliş tələb etmədən normal işləyir. Ancaq tətbiqlərin çoxu əvvəlcə fərqli prosessor quruluşuna - Arm arxitekturasına uyğun hazırlanıb. Buna görə bəzi mürəkkəb tətbiq və oyunların Intel əsaslı cihazlarda yaxşı işləməsi üçün tərtibatçılar onları ayrıca uyğunlaşdırmalıdır.

    Satışa çıxan 5 “Googlebook” noutbuku arasında 3 model x86 quruluşlu “Intel” çipləri ilə işləyir. Bunlar “Acer”, “Asus” və “Lenovo” modelləridir. “Dell” və “HP” modellərində Arm əsaslı “Qualcomm Snapdragon” prosessorları var. Buna görə həmin cihazların “Android” tətbiqləri ilə daha yaxşı uyğunlaşacağı gözlənilir.

    “Google” problemin neçə tətbiqə təsir etdiyini və hansı tətbiqlərdə çətinlik yarana biləcəyini açıqlamayıb. Şirkət işi sürətləndirmək və bütün modellərdə uyğunluğu artırmaq üçün tətbiq tərtibatçıları, “Intel” və “Qualcomm”la əməkdaşlıq edir. Yəni problem tətbiqlərin mağazada olmaması deyil. Söhbət bəzi cihazlarda onların zəif işləməsindən gedir.