Google Googlebook noutbuklarını və Android əsaslı sistemini təqdim etdi

    “Google” may ayındakı qısa nümayişdən sonra premium “Googlebook” noutbuklarını və “Googlebook OS” əməliyyat sistemini elan edib. “Android” üzərində qurulan sistem “ChromeOS”un masaüstü görünüşünü də qoruyur. Noutbuklar üçün öncədən sifarişlər artıq açılıb. Satış ABŞ-də 4 oktyabrda, Kanada, Böyük Britaniya, İrlandiya, Fransa, Almaniya və Avstraliyada 5 oktyabrda başlayacaq.

    İlk 5 modeli “HP”, “Dell”, “Lenovo”, “Acer” və “Asus” hazırlayıb. Noutbuklarda “Qualcomm Snapdragon X Elite”, “Intel Core Ultra 5” və ya “Core Ultra 7” prosessoru var. Bütün modellərdə ən azı 16 GB operativ yaddaş və fayllar üçün 256 GB yaddaş qoyulub. Bəzi versiyalarda operativ yaddaş 32 GB, daxili yaddaş isə 1 TB-dır. OLED ekran seçimlərindən birinin təsvir ölçüsü 2880 x 1800 pikseldir. Qapaqdakı rəngli işıq zolağı - “Glowbar” batareya səviyyəsini göstərir, həmçinin “Gemini” ilə danışarkən reaksiya verir.

    Qiymət baxımından ən ucuz model 899 dollardan başlayır (təxminən 1530 manat). Ancaq bu qiymət “Acer Googlebook 14” üçün məhdud müddətə keçərlidir. “Dell XPS Googlebook” 1199 dollara (təxminən 2040 manat) satılacaq. “HP Googlebook 14”, “Lenovo Googlebook 15” və “Asus Googlebook 14” modellərinin qiyməti 1299 dollardan (təxminən 2210 manat) başlayır. Beləliklə, noutbuklar premium “Windows” modelləri və “MacBook Air” ilə eyni qiymət kateqoriyasında rəqabət aparacaq.

    “Googlebook OS”un masaüstünə tətbiq, fayl, qovluq və telefonlardakı kimi vidjetlər əlavə etmək olur. Sistem vebin imkanlarından geniş yararlanır. “Gmail” və “Google Calendar” Android tətbiqi kimi deyil, veb versiyada açılır. “Chrome” brauzerində genişləndirmələrdən və şaquli tablardan istifadə etmək olur. “Play Store”dan “Photoshop”, “Lightroom”, “CapCut”, “Netflix” və “Disney+” kimi tətbiqləri quraşdırmaq olar. Video xidmətlərindəki məzmunu internetsiz izləmək üçün əvvəlcədən yükləmək də olur.

    İlk quraşdırma zamanı hesab, kontaktlar, parollar, ödəniş məlumatları və şəxsi seçimlər telefondan noutbuka köçürülür. “Continue On” telefonda başladığınız işi noutbukda davam etdirmək üçündür. “Cast My Apps” funksiyası ilə telefon tətbiqlərini kompüterdən idarə etmək olur. Qoşulan telefon fayl menecerində ayrıca yaddaş kimi görünür. Bildirişlər hər iki cihazda sinxronlaşır, mesajlara noutbukdan da cavab vermək olur. Bu əsas bağlantı funksiyaları üçün Android 17 ilə çalışan telefon tələb olunur.

    “Gemini Nano” süni intellekt modeli internetə ehtiyac duymadan cihazın özündə işləyir. O, ekran görüntülərini təsvir edir və faylların axtarışını asanlaşdırır. “Magic Pointer” ilə seçilən məzmun haqqında sual vermək və həmin məzmuna uyğun əmrləri işə salmaq olur. “Quick Insert” düyməsi kopyalanan mətnlərin tarixçəsini, tərcüməni, emojiləri və səsli mətni düzəldən “Rambler” funksiyasını açır. “Create My Widget” canlı məlumatlar əsasında fərdi vidjetlər hazırlayır. “Antigravity” Android proqramları və veb tətbiqləri yaratmaq üçündür, burada Linux terminalı da var.

    “Google” bütün tərəfdaşların noutbuklarında eyni interfeysi saxlayacaq. Yeniləmələri istehsalçılardan asılı olmadan birbaşa şirkət göndərəcək. “Googlebook OS” rüblük əsasda böyük yeniləmələr alacaq, təhlükəsizlik paketləri də bu yeniləmələr arasındakı dövrdə yayılacaq. “Google” 10 illik dəstək vəd edir. Lakin bu müddət noutbukun satış tarixindən deyil, onun platforması və prosessorunun çıxdığı tarixdən hesablanır. Əsas çatışmazlıq böyük ekrana uyğunlaşdırılmış Android tətbiqlərinin az olmasıdır. Bəzi proqramlar yalnız telefon ölçüsündə pəncərədə işləyir və bu, həmin qiymət səviyyəsində istifadəçilər üçün problem yarada bilər.