iPhone 12-də elektromaqnit şüalanması problemi proqram təminatı yenilənməsi ilə həll ediləcək

    Dünən məlum oldu ki, Fransada iPhone 12-nin satışları qadağan edilib. Səbəb isə sözügedən smartfonda elektromaqnit şüalanması göstəricisinin (SAR göstəricisi) normadan yüksək olmasındadır. Hətta bəzi Avropa ölkələri də öz ərazilərində iPhone 12-nin satışlarının dayandırılmasına hazır olduqlarını bildiriblər. Lakin Apple şirkəti iPhone 12-də bu problemin aradan qaldırılması üçün nəzərdə tutulmuş proqram təminatı yenilənməsini təqdim etməyə razı olub.

    Bloomberg saytının verdiyi məlumata əsasən şirkət tərəfindən təqdim ediləcək proqram təminatı yenilənməsi yalnız iPhone 12-də işə salınacaq. Qeyd etmək lazımdır ki, Fransa hökuməti Apple şirkətinə problemi aradan qaldırmaq üçün 2 həftə vaxt verib. Görünür, şirkət bu müddət ərzində proqram təminatı yenilənməsini təqdim etməyi bacaracaq. Şirkət əməkdaşlarının sözlərinə əsasən proqram təminatı yenilənməsi iPhone 12-də yaranmış bu problemi tamamilə aradan qaldıracaq.