Dünən məlum oldu ki, Fransada iPhone 12-nin satışları qadağan edilib. Səbəb isə sözügedən smartfonun SAR (insan orqanizmi tərəfindən udulan elektromaqnit şüalanmasının miqdarını təyin edən göstərici) göstəricisinin normadan yüksək olmasıdır. İndi isə məlum olub ki, eyni səviyyəli qadağa həmçinin Belçika, Almaniya, İtaliya və Hollandiyada tətbiq edilə bilər. Apple öz növbəsində iPhone 12-də SAR göstəricisinin normadan yüksək olması iddiasını təkzib edir və bildirir ki, smartfon yerli tənzimləyici orqanlar tərəfindən bütün tələblərə uyan cihaz kimi sertifikatlaşdırılıb.

    Məlumatda qeyd edilib ki, hal hazırki mərhələdə Belçikanın tənzimləyici orqanı iPhone 12-nin istifadəçilərin səhhətləri üçün hansı risklərə sahib olduğunu təyin etmək istiqamətində istintaq keçirtməyə hazırlaşır. Almaniya, İtaliya və Hollandiya vəziyyəti yaxından izləyirlər və lazım olacağı halda öz araşdırmalarını aparmağa hazırdırlar. Məlumata əsasən Hollandiyanın telekommunikasiya sahəsindəki tənzimləyici orqanı Apple-dan bu məsələ ilə bağlı açıqlamaların təqdim edilməsini istəyib.