Apple, iPad Pro ilə bizə tanıtdığı M4 prosessorunu Mac modellərinə gətirməyə hazırlaşır. MacBook Pro, bu yeni prosessoru alan ilk Mac cihazlarından biri olacaq. Şirkətin ayın sonunda keçirəcəyi gözlənilən tədbirdə M4-lü MacBook Pro-nu təqdim edəcəyini düşünürük. Bu mövzuda isə maraqlı bir hadisə baş verib. Wylsacom adlı bir rus YouTuber, M4-lü MacBook Pro-nun əlinə keçdiyini iddia edib və cihazın qutu açılışını göstərən bir video paylaşıb. Bloomberg-dən olan etibarlı mənbə Mark Gurman isə X-də paylaşdığı bir yazıda videodakı məhsulun real ola biləcəyini ifadə edib. Bu video bizə MacBook Pro-da hansı yenilikləri görə biləcəyimizə dair ipucları verir - əlbəttə əgər həqiqidirsə.

     Videonun doğruluğunu sübut etmək mümkün olmasa da, cihazda olacaq bəzi təkmilləşdirmələr haqqında fikir əldə edə bilirik. YouTuber-in dediyinə görə, 14 düymlük MacBook Pro-dakı yeni M4 çipi 10 nüvəli CPU ilə gələcək. Bu, M3-dəki 8 nüvəli strukturu qabaqlayır deməkdir. Performans baxımından isə yeni prosessorun əvvəlki nəsillə müqayisədə 25% daha sürətli olacağını görəcəyik. Təbii ki, bunlar yeni məlumatlar deyil, may ayında çıxan iPad Pro-da da bu göstəriciləri görmüşdük. İndiyə qədər yayılan sızıntılar Apple-ın bütün Mac-lərdə minimum 16 GB RAM-ə keçməyi planlaşdırdığını göstərirdi. Qutu açılışı videosu da bunu təsdiqləyir. Belə ki, videoda yeni 14 düymlük M4 MacBook Pro-nun 16 GB RAM ilə gələcəyi qeyd olunur.

     Bundan əlavə, qutu açılışı cihazın 4 Thunderbolt portu ilə satışa çıxacağını göstərir. Mövcud modeldə 3 port olduğunu nəzərə alsaq, bunun da bir təkmilləşdirmə olduğunu hesab edə bilərik. Həmçinin "Kosmik Qara" rəng seçiminin standart MacBook Pro modelinə gələcəyi də bildirilir. Hal-hazırda bu seçim yalnız M3 Pro və ya M3 Max çipli cihazlarda mövcuddur. Videodakı MacBook Pro-nun həqiqi olub-olmadığı məlum deyil. Lakin sentyabrın sonunda yeni MacBook Pro-ya aid olduğu iddia edilən bir sızıntı ortaya çıxmışdı. O sızıntıda cihazın ələ keçirildiyi və gizli şəkildə bir Facebook qrupunda satıldığı bildirilmişdi. Bəlkə də bu həmin məhsullardan biri ola bilər. Həqiqətən belə olub-olmadığını görmək üçün Apple-ın bu ay keçiriləcək tədbirini gözləməliyik.