macOS 26.4 yeniliyi: Batareya ömrünü uzadan slayder istifadəyə verildi

    Technote.az “Apple Insider” platformasına istinadən bildirir ki, Apple macOS Tahoe 26.4 versiyasında MacBook istifadəçiləri üçün vacib bir yeniliyi təqdim edib. Yeni developer beta versiyasında artıq batareyanın maksimum şarj səviyyəsini istifadəçi özü təyin edə bilir.

    Bu funksiya ilk dəfə iPhone 15 seriyası ilə təqdim edilmişdi. Apple həmin vaxt istifadəçilərə batareyanın uzunömürlülüyünü qorumaq məqsədilə cihazı maksimum 80 %-ə qədər şarj etməyə imkan verən seçim təqdim etmişdi. Daha sonra iOS 18 ilə bu seçim daha da genişləndirildi və istifadəçilər 80 % ilə 100 % arasında istənilən limiti təyin edə bildilər.

    İndi isə eyni imkan macOS Tahoe 26.4 ilə Mac kompüterlərə də gətirilib. Sistem Ayarları (System Settings) → Battery bölməsinə daxil olaraq “Charging” bölməsinin yanındakı informasiya ikonuna klikləməklə “Charge Limit” funksiyasını aktiv etmək mümkündür. Burada xüsusi slayder vasitəsilə şarj limiti 80 %-dən 100 %-ə qədər tənzimlənir. Bundan əlavə, iOS 26.4 və macOS 26.4 developer beta versiyalarında bu funksiya artıq Shortcuts tətbiqi ilə də inteqrasiya olunub. Bu isə daha fərdi ssenarilər qurmağa imkan verir. Məsələn, istifadəçi iş günlərində şarj limitini 80 %-də saxlaya, səfər və ya dərs günlərində isə 100 %-ə yüksəldə bilər.

    Bu yeniliyin praktik faydası istifadəçinin iş vərdişlərindən asılı olacaq. Gün ərzində MacBook-u əsasən şəbəkəyə qoşulu saxlayan istifadəçilər üçün bu funksiya batareyanın sağlamlığını qorumaq baxımından olduqca faydalıdır. Lakin cihazı tez-tez mobil şəkildə istifadə edən tələbələr və səfərdə olan şəxslər üçün 100 % şarj daha praktik ola bilər.