macOS-un köhnə Terminal alətlərindən biri tarixə qovuşur

    Apple macOS əməliyyat sistemində uzun illərdir mövcud olan hdiutil Terminal alətini istifadədən çıxarmağa hazırlaşır. Disk obrazlarının yaradılması, qoşulması, ölçüsünün dəyişdirilməsi və idarə olunması üçün istifadə edilən bu komanda macOS Golden Gate versiyasında rəsmi olaraq köhnəlmiş, yəni “deprecated” statusuna keçirilib.

    hdiutil Mac OS X-in ilk dövrlərindən macOS-un tərkibindədir. Adi istifadəçilərin əksəriyyəti bu alətlə birbaşa qarşılaşmasa da, müxtəlif disk idarəetmə, ehtiyat nüsxələmə və sistem utilitləri ondan arxa planda istifadə edir. Apple macOS 27.0-dan etibarən istifadəçilərə və proqram tərtibatçılarına hdiutil əvəzinə diskutil image alətinə keçməyi tövsiyə edir. Yeni alət disk obrazlarının qoşulması, yaradılması, ölçüsünün dəyişdirilməsi və digər əsas əməliyyatları dəstəkləyir.

    Bu, hdiutil-in macOS Golden Gate-dən dərhal silinəcəyi demək deyil. Alət hələlik işləməyə davam edəcək, lakin Apple onun gələcək macOS versiyalarından birində tamamilə çıxarılacağını təsdiqləyir. Buna görə də hdiutil-dən istifadə edən tətbiqlərin tərtibatçıları proqramlarını diskutil image ilə işləməyə uyğunlaşdırmalı olacaqlar. Keçid bəzi hallarda sadəcə komandanın adını dəyişməklə də həll olunmur. Tərtibatçı Jeff Johnson-un sözlərinə görə, iki alətin davranışında müəyyən fərqlər var. Məsələn, hdiutil ehtiyat nüsxələmə prosesi zamanı root istifadəçisinə məxsus faylla qarşılaşdıqda autentifikasiya tələb edə bilir. diskutil image isə eyni vəziyyətdə autentifikasiya pəncərəsi göstərmək əvəzinə ümumi xəta mesajı ilə əməliyyatı dayandıra bilər.

    Apple-ın bu qərarının təhlükəsizliklə əlaqəli olması da mümkündür. Şirkət 15 oktyabr 2025-ci ildə macOS Sonoma üçün yayımladığı təhlükəsizlik yeniləməsində hdiutil əmrlərindən birinin gözlənilmədən zərərli kodun icrasına imkan verə bilən boşluğa malik olduğunu açıqlamışdı. Apple həmin problemi həssas kodu sistemdən çıxarmaqla aradan qaldırmışdı.