Meta ilk kamerasız ağıllı eynək və 5K virtual reallıq eynəyi təqdim etdi

    “Meta” şirkəti “Connect 2026” tədbirində ilk kamerasız ağıllı eynəyi “Ray-Ban Meta Audio”nu və “Meta VR Glasses” virtual reallıq eynəyini göstərib. Yalnız səs funksiyalarına fokuslanan “Ray-Ban Meta Audio” 349 dollara (təxminən 590 manat) satılacaq. Model 13 oktyabrda öncədən sifarişə açılacaq. Kameranın çıxarılması gizli çəkiliş və icazəsiz video qeydi ilə bağlı tənqidlərə cavab kimi qiymətləndirilir.

    “EssilorLuxottica”nın hazırladığı “Ray-Ban Meta Audio” ilə musiqi və podkast dinləmək, zənglərə cavab vermək və danışığı başqa dilə çevirmək olur. Eynək “Muse” süni intellekt köməkçisi ilə də işləyir. “Hearing Enhancement” funksiyası yüngül və orta eşitmə itkisi olan insanların səsləri daha aydın eşitməsi üçündür. Beləliklə, eynək reseptsiz eşitmə cihazı kimi də işləyə bilər.

    “Ray-Ban Meta Audio” 43 qramdır və şirkətin digər ağıllı eynəklərindən daha yüngül və nazikdir. Batareya bir dolumla 12 saata qədər işləyir. Şarj qutusu ilə ümumi istifadə müddəti 48 saata çatır. Eynəkdə ölçüsü tənzimlənən qulaq dayaqları, dəyişdirilə bilən burun yastıqları və daha geniş açılan menteşələr var. Model “Clubmaster” və düzbucaqlı “Burbank” üslublarında satılacaq. Alıcılar 23 rəng və linza kombinasiyasından seçim edə biləcəklər.

    “Meta” kameralı “Ray-Ban Meta Gen 3” eynəyini də nümayiş etdirib. “Wayfarer”lə yanaşı, “Aviator” və pişik gözü formasındakı “Zena” çərçivələri də satışa çıxacaq. Eynəyin 12 MP kamerası 3K keyfiyyətdə video çəkir. Modeldə 6 mikrofon var və batareya 9 saata qədər işləyir. Eynəkləri optik reseptə uyğun linzalarla sifariş etmək olacaq. Satış coğrafiyası genişlənəcək, müğənni “Lisa” ilə hazırlanan variantlar da çıxacaq.

    Bütün yeni eynəklərdə “Muse” köməkçisi işləyəcək. Gələcək yeniliklərdən biri “Dolby Atmos Capture” funksiyasıdır. Bu funksiya ətrafdan gələn səsləri istiqamətinə uyğun yazacaq. Həmçinin bir neçə kadr arasından ən yaxşı fotonu seçmək, şaquli və ya üfüqi çəkiliş rejimindən istifadə etmək olacaq. Daha ətraflı cavablar, fərqli səs rejimləri və dəyişdirilə bilən idarəetmə seçimləri də hazırlanır. “Meta”nın məlumatına görə, “Private Processing” funksiyası istifadəçi məlumatlarını şirkətdən gizli saxlayacaq.

    “Meta VR Glasses” 2 hissədən ibarətdir. Ekran və sensorlar 100 qramlıq eynəkdə yerləşir. Prosessor, yaddaş və batareya isə optik kabellə qoşulan ayrıca blokdadır. Micro OLED ekranların təsvir ölçüsü 5K-dır və hər dərəcəyə 37 piksel düşür. Ekranlarda rəng və görüntü keyfiyyətini yaxşılaşdıran “Dolby Vision” dəstəyi də var. Çərçivədəki dinamiklər “Dolby Atmos” məkan səsini, yəni səsin müxtəlif istiqamətlərdən gəlməsi effektini yaradır. Sensorlarla eynəyi baxış və əl hərəkətləri ilə idarə etmək olur.

    Virtual reallıq eynəyi “Snapdragon Reality Elite” çipi ilə işləyir. Ayrıca blok batareyanın 3 saata qədər işləməsinə kömək edir və 45 Vt sürətli şarjı dəstəkləyir. “IMAX Enhanced” sertifikatlı cihazda 3D filmlərə baxmaq və “Xbox Cloud Gaming” oyunlarını oynamaq olur. “Hologram Calling” funksiyası videozəng zamanı istifadəçinin mimikalarını real vaxtda, gerçəyə yaxın görüntü ilə göstərir. “Meta VR Glasses” 2027-ci ilin yazında satışa çıxacaq və qiyməti 1299 dollardan (təxminən 2210 manat) başlayacaq.