Microsoft Copilot-u “super tətbiq”ə çevirir

    Microsoft Copilot ekosistemində böyük dəyişiklik etməyə hazırlaşır. Şirkət fərdi istifadəçilər üçün nəzərdə tutulan Copilot və iş mühitinə yönəlmiş Microsoft 365 Copilot tətbiqlərini vahid tətbiqdə birləşdirəcəyini açıqlayıb. Yeni tətbiq Microsoft Copilot adını daşıyacaq və yenilənmiş ikonla təqdim olunacaq. Bununla da Windows-da eyni anda iki fərqli Copilot tətbiqinin və ikonunun görünməsi problemi aradan qalxacaq. Microsoft bildirir ki, yenilənmiş tətbiq Copilot-un süni intellekt çatını və şəkil yaratma imkanlarını Microsoft 365-in iş alətləri ilə bir araya gətirəcək. Bu dəyişiklik şirkətin ilin sonlarında təqdim etməyi planlaşdırdığı daha geniş funksiyalara sahib “super tətbiq” üçün texniki baza rolunu oynayacaq.

    Yeni Copilot-un mobil və veb versiyalarının qlobal yayımı avqustun ortalarında, Windows və Mac versiyalarının isə sentyabrın ortalarında başlamalıdır. Bəzi Windows Insider istifadəçiləri yenilənmiş tətbiqi artıq bu həftədən sınaqdan keçirə biləcəklər. Hazırda adi Microsoft Copilot-dan istifadə edənlərin söhbətləri və məzmunları yeni tətbiqə köçürüləcək. Microsoft 365 Copilot istifadəçiləri isə yenilənmiş interfeys, yeni ikon və Copilot Chat imkanını əldə edəcəklər. Hər iki tətbiqdən istifadə edənlərin məzmunu vahid tətbiqdə əlçatan olacaq.

    Bununla belə, şəxsi və iş hesablarının məlumatları bir-birinə qarışmayacaq. İstifadəçilər Microsoft şəxsi hesabı ilə Microsoft Entra ID üzərindən iş və ya təhsil hesabları arasında keçid edə biləcəklər. Microsoft korporativ təhlükəsizlik, uyğunluq və dövlət qurumları üçün mövcud nəzarət mexanizmlərinin dəyişməyəcəyini bildirir. Copilot-un əsas funksiyaları pulsuz qalacaq, lakin pulsuz istifadəçilər üçün bəzi istifadə limitləri dəyişə bilər. Birləşmə zamanı bəzi funksiyalar isə ləğv edilir. Podcasts və Deep Research avqustun 18-dən etibarən dayandırılacaq. Group Chat daxilindəki söhbətlər, mesajlar və məzmun da yeni tətbiqə köçürülməyəcək. Shopping və Copilot Health kimi bəzi xidmətlər isə keçid dövründə müvəqqəti olaraq əlçatmaz ola bilər.