Microsoft fiziki Xbox oyunlarını rəqəmsala çevirmək istəyir

    Microsoft fiziki oyun disklərindən imtina edən oyunçular üçün yeni həll üzərində işləyir. Şirkətin "Positron" kod adlı yeni proqramı istifadəçilərə sahib olduqları bəzi fiziki Xbox oyunlarını rəqəmsal versiyaya çevirməyə imkan verə bilər. Son dövrlərdə oyun sənayesində rəqəmsal satışlara keçid sürətlənib. Xüsusilə, Sony-nin 2028-ci ildən etibarən yeni PlayStation oyunları üçün fiziki disklərə dəstəyi dayandıracağı ilə bağlı xəbərlər oyunçular arasında ciddi narazılıq yaradıb. Bu vəziyyətdə Microsoft mümkün tənqidlərin qarşısını almaq və istifadəçilərin mövcud oyun kitabxanalarını qorumaq üçün yeni addım atmağa hazırlaşır.

    Məlumata görə, "Positron" proqramı istifadəçilərə əlavə avadanlıq olmadan fiziki oyun disklərini rəqəmsal lisenziyaya çevirməyə imkan verəcək. Bunun üçün yalnız oyun diski, uyğun Xbox konsolu və Microsoft hesabı tələb olunacaq. Yeni sistem yalnız Xbox One və Xbox Series X oyun disklərini əhatə edəcək. Köhnə nəsil olan orijinal Xbox və Xbox 360 oyunları isə bu proqramın dəstəklədiyi siyahıya daxil edilməyəcək.

    Microsoft-un bu addımı, xüsusilə böyük fiziki oyun kolleksiyasına sahib istifadəçilər üçün vacib hesab edilir. Çünki gələcəkdə disk oxuyucusu olmayan konsolların geniş yayılması milyonlarla oyunçunun köhnə oyunlarını istifadə edə bilməməsi riskini yaradır. Hazırda "Positron" layihəsi sınaq mərhələsindədir və nə proqram, nə də gələcək nəsil Xbox Helix konsolu rəsmi olaraq təqdim olunub. Buna görə də layihənin detalları gələcəkdə dəyişə bilər.