Microsoft Office tətbiqlərinə “Agent Mode” gətirdi

    Technote.az “The Verge” platformasına istinadən bildirir ki, Microsoft istifadəçilərin iş prosesini daha da avtomatlaşdırmaq üçün Office tətbiqlərində yeni “Agent Mode” funksiyasını istifadəyə verib. Şirkətin əvvəllər “vibe working” kimi təqdim etdiyi bu yenilik artıq Microsoft 365 Copilot və Premium abunəçilər üçün standart rejimə çevrilir.

    Microsoft-un Office məhsulları üzrə vitse-prezidenti Sumit Chauhan bildirib ki, əvvəlki Copilot versiyası daha çox passiv idi və əsasən suallara cavab verə bilirdi. Lakin yeni Agent Mode süni intellektin imkanlarını genişləndirərək artıq birbaşa sənəd üzərində əməliyyatlar aparmağa imkan yaradır.

    Yeni sistem istifadəçinin verdiyi tapşırıqları daha dəqiq anlayır və bir neçə mərhələli əməliyyatları ardıcıl şəkildə yerinə yetirə bilir. Məsələn, Microsoft Excel daxilində avtomatik olaraq formulalar əlavə edə, cədvəllər yarada və məlumatları analiz edə bilir. Microsoft PowerPoint isə mövcud təqdimatları yeniləyərək yeni məlumatlarla zənginləşdirir və şirkətlərin istifadə etdiyi dizayn üslubunu qoruyur.

    Bundan əlavə, istifadəçilər süni intellektin gördüyü işləri real vaxtda izləyə biləcəklər. Bunun üçün xüsusi yan panel təqdim olunub və burada Copilot-un hansı addımları atdığı mərhələli şəkildə göstərilir. Microsoft bu yeniliyi təkcə korporativ istifadəçilərlə məhdudlaşdırmır. Agent Mode həmçinin Microsoft 365 Personal və Microsoft 365 Family paketlərində də əlçatan olacaq.