Microsoft-un gizli Xbox kontrolleri təsadüfən satılıb?

    Microsoft-un hələ rəsmi olaraq təqdim etmədiyi Xbox Elite Controller 3 gözlənilmədən bir istifadəçinin əlinə keçmiş ola bilər. Maraqlısı odur ki, həmin şəxs yeni modeli deyil, Xbox Elite Controller 2 almaq istəyirmiş. Hadisə OfferUp mobil satış platformasında baş verib. Reddit-də ssuberlex adlı istifadəçi aldığı kontrollerin fotolarını paylaşaraq bunun hələ satışa çıxmayan Elite Controller 3 olub-olmadığını soruşub. Digər istifadəçilər fotoları daha əvvəl yayılan görüntülərlə müqayisə edərək cihazın həqiqətən də yeni modelə bənzədiyini bildiriblər.

    Xbox Elite Controller 3 haqqında ilk ciddi məlumatlar may ayında ortaya çıxmışdı. Braziliyanın telekommunikasiya tənzimləyicisi Anatel cihazın görüntülərini səhvən yayımlamış və bununla da yeni kontrollerin dizaynı üzə çıxmışdı. Reddit-də paylaşılan cihazın həmin görüntülərlə oxşarlığı diqqət çəkir. Lakin kontrollerin bir problemi var: alıcının sözlərinə görə, cihaz Xbox-a nə simsiz, nə də kabel vasitəsilə qoşulur. Buna görə bəzi istifadəçilər onun adi satış üçün nəzərdə tutulan məhsul deyil, Microsoft və ya tərəfdaşlarının istifadə etdiyi prototip və ya developer kit üçün hazırlanmış cihaz ola biləcəyini düşünürlər.