Motorola vaxtından tez açıqladı: Razr Flex qatlanan telefonu 2027-də gəlir

    “Motorola” geniş formatlı qatlanan smartfonu barədə əsas məlumatları vaxtından əvvəl açıqlayıb. Şirkətin saytında görünən dəstək səhifəsi cihazın “Razr Flex” adlanacağını və 2027-ci ildə satışa çıxacağını təsdiqləyib. Rəsmi təqdimat hələ olmayıb. Buna görə səhifənin səhvən yayımlandığı güman edilir. “Motorola” daha əvvəl cihazın yalnız siluetini göstərmişdi.

    Səhifədə təqdimatın və satışın dəqiq tarixi yazılmayıb. Ancaq “Razr Flex” modelinin 2026-cı ilin sonunadək bazara çıxmayacağı demək olar ki, dəqiqləşib. İlkin məlumatlara görə, geniş formatlı qatlanan smartfon 2026-cı ildə göstərilə bilərdi. Saytdakı səhifədə buraxılış ili 2027 kimi qeyd olunub.

    “Razr Flex” yığcam gövdəli ola və 3D şüşə örtüklə buraxıla bilər. “Motorola” qatlanan ekranın ortasındakı izin görünməməsini də hədəfləyir. Ancaq bu xüsusiyyətlərin hazır məhsulda olub-olmayacağı hələ təsdiqlənməyib. Arxa paneldə 2 kameranın olacağı gözlənilir. Beləliklə, cihaz oxşar geniş qatlanan modellərə yaxın görünəcək.

    Smartfonun xarici ekranının 4,97 düym olacağı gözlənilir. Bu ekran rəqib geniş qatlanan smartfonlardakından xeyli kiçikdir və cihazın daha yığcam qalmasına kömək edə bilər. “Razr Flex” gələcək “iPhone Duo” və “Galaxy Z Fold 8” modellərinə rəqib kimi hazırlanır. Digər texniki göstəricilər və qiymət hələ açıqlanmayıb.