Nothing Phone (4a) yeni rənglərlə gələ bilər

    Technote.az “9to5Google ” platformasına istinadən bildirir ki, yeni sızıntıya görə, Nothing şirkəti yaxın zamanda təqdim edəcəyi Nothing Phone (4a) seriyasında həm dizayn, həm də qiymət siyasətində ciddi dəyişikliklər edə bilər. Telegram-da fəaliyyət göstərən “Unreliable cat” adlı sızıntı mənbəyinin iddiasına əsasən, yeni smartfonlar Snapdragon 7s seriyalı prosessorlarla təchiz olunacaq və əvvəlki nəsillə müqayisədə xeyli bahalaşacaq.

    Məlumata görə, Nothing Phone (4a)-nın 12 GB RAM və 256 GB yaddaşlı versiyasının qiyməti təxminən 475 dollar olacaq. Bu isə Phone (3a)-nın eyni konfiqurasiyada 379 dollar olan qiyməti ilə müqayisədə ciddi artım deməkdir. Daha güclü Nothing Phone (4a) Pro modelinin qiymətinin isə 540 dollar səviyyəsində olacağı iddia edilir. Halbuki Phone (3a) Pro hazırda təxminən 459 dollara satılır. Sızıntıda dizaynla bağlı yeniliklərə də toxunulub. İddiaya görə, Nothing bu il rəng seçimlərini genişləndirərək seriyaya çəhrayı rəng variantı əlavə edəcək. Xatırladaq ki, şirkətin ilk modelləri yalnız ağ və qara rənglərdə təqdim olunmuş, ötən il isə Phone (3a) ilə mavi rəng də əlavə edilmişdi.

    Bundan əlavə, eyni çəhrayı rəngin daha sərfəli qulaqlıq modeli olan “Nothing Headphone (a)” üçün də istifadə ediləcəyi bildirilir. Plastik korpusa sahib olacağı deyilən bu qulaqlıqların qara, ağ və sarı rənglərdə də satışa çıxacağı qeyd olunur.