Nvidia standart Shield TV pleyerini istehsaldan çıxardı, Pro 50% bahalaşdı

    “Nvidia” standart “Shield TV” media pleyerinin istehsalını rəsmən dayandırıb. Şirkət bundan sonra yalnız “Shield TV Pro” modelini satacaq. Cihazın qiyməti 199 dollardan (təxminən 340 manat) 299,99 dollara (təxminən 510 manat) qalxıb. Başqa sözlə, model 100 dollar (170 manat), yəni təxminən 50% bahalaşıb. Qiymət dəyişikliyi cihazın satışa çıxmasından 7 il sonra edilib.

    “Nvidia” bahalaşmanı yaddaş və digər hissələrin bütün sənayedə ciddi qiymət artımı ilə izah edib. Süni intellekt sistemlərinə yüksək tələbat bu hissələrin qiymətini artırır. Boru formalı standart model aylardır stokda yox idi, indi isə onun istehsalı tam dayandırılıb. “Shield TV Pro” yenidən “Best Buy” mağazalarında satışa çıxıb.

    “Shield TV Pro” 2019-cu ilin oktyabrında satışa çıxıb və həmin vaxtdan cihazın texniki hissələri yenilənməyib. Modeldə “Tegra X1” çipi var və cihaz 256 nüvəli GPU ilə təchiz olunub. Buradakı GPU görüntünün işlənməsinə cavabdeh qrafik prosessordur. Media pleyerində 3 GB operativ yaddaş və 16 GB daxili yaddaş var.

    Cihaz 4K HDR və “Dolby Vision” görüntü formatlarını dəstəkləyir. Süni intellektlə aşağı keyfiyyətli görüntünü saniyədə 60 kadr sürətlə 4K səviyyəsinə yüksəldə bilir. Bu, videonun daha aydın görünməsinə kömək edir.

    Yaşı çox olsa da, “Shield TV Pro” hələ də ən güclü “Android TV” media pleyerlərindən biri sayılır. Ancaq cihaz AV1 video formatını dəstəkləmir. “Nvidia” ilin əvvəlində “Shield TV” üçün proqram yeniləmələrini gələcəkdə də davam etdirəcəyini açıqlamışdı.

    Şirkətin “GeForce Now” bulud oyun xidməti kompüterlərdə, mobil cihazlarda və smart televizorlarda işləyir. Xidmətdən “LG” və “Samsung” televizorlarında da yararlanmaq olur.

    Komponent çatışmazlığının ən azı 2027-ci ilə qədər davam edəcəyi gözlənilir. Bu səbəbdən yaxın vaxtlarda yeni “Shield TV Pro” modelinin çıxması az ehtimallıdır. “Google TV Streamer” 50 dollar (85 manat) bahalaşaraq 149 dollara (təxminən 250 manat) çatıb. “Apple TV 4K” və “Roku” cihazlarının qiymətləri də bu il artıb. Bununla yanaşı, yeni “Apple TV” modelinin yaxın vaxtlarda göstəriləcəyi gözlənilir.