Ring Neighbors tətbiqi ilə itmiş itlərin tapılması daha asan olacaq

    Technote.az “The Verge” platformasına istinadən bildirir ki, Ring itmiş ev heyvanlarının tapılması üçün yaratdığı “Search Party” xidmətini artıq yalnız Ring istifadəçiləri ilə məhdudlaşdırmır. Şirkət bu funksiyanı pulsuz Ring Neighbors tətbiqi vasitəsilə ABŞ-də yaşayan hər kəs üçün əlçatan edib.

    Yeni imkan sayəsində istifadəçilər tətbiqi yükləyib qeydiyyatdan keçdikdən sonra itmiş ev heyvanlarının fotosunu paylaşa bilirlər. Əgər yaxınlıqdakı süni intellektlə təchiz olunmuş Ring kamerası həmin heyvanı aşkar edərsə, sistem avtomatik olaraq sahibinə xəbərdarlıq göndərir. Ring-in açıqlamasına görə, xidmət istifadəyə verildiyi vaxtdan bəri gündə orta hesabla ən azı bir it sahibinə qaytarılıb. Bu da funksiyanın real nəticə verdiyini göstərir.

    Bununla yanaşı, şirkət ABŞ üzrə heyvan sığınacaqlarını dəstəkləmək üçün 1 milyon dollar dəyərində kamera sistemləri bağışlayacağını açıqlayıb. Məqsəd itmiş və sahibsiz heyvanların daha tez müəyyən edilərək sahiblərinə qaytarılmasıdır.